بلوچستان کے عوام کا احساس محرومی دور کرنے کی ہر ممکن کوشش کر رہے ہیں، وزیراعظم

اسلام آباد: وزیراعظم عمران خان کا کہنا ہے کہ ہمیں بلوچستان کی عوام کے احساس محرومی کا مکمل ادراک ہے۔ اس کو دور کرنے کے لئے ہر ممکن کوشش کی جا رہی ہے۔

وزیرِاعظم عمران خان کے زیرصدارت نیشنل ڈویلپمنٹ کونسل کا دوسرا اجلاس اسلام آباد میں ہوا جس میں قومی ترقیاتی ایجنڈے پر تفصیلی غور کیا گیا ۔ اجلاس میں بلوچستان کے پسماندہ علاقوں میں آمدورفت، آبی وسائل کے بہتر استعمال، زراعت، توانائی کے منصوبے، بارڈر مارکیٹوں کے قیام اور گوادر پورٹ سے مکمل طور پر استفادہ حاصل کرنے کے لئے مختلف منصوبے زیر غور آئے۔

اجلاس سے خطاب کرتے ہوئے وزیراعظم نے کہا کہ بلوچستان میں مکمل امن وامان کو یقینی بنانا اور سماجی واقتصادی ترقی حکومت کی اولین ترجیح ہے۔ ماضی میں بلوچستان میں وسائل کے عوام کی فلاح وبہبود پر استعمال کو یکسر نظر انداز کیا گیا، جس سے صوبے کا بڑا حصہ پسماندگی کا شکار رہا اور عوام میں احساس محرومی پیدا ہوا۔

نیشنل ڈویلپمنٹ کونسل کے دوسرے اجلاس چیف آف آرمی سٹاف جنرل قمر جاوید باجوہ، معاون خصوصی عاصم سلیم باجوہ، ڈی جی آئی ایس آئی لیفٹننٹ جنرل فیض حمید، وفاقی وزرا شاہ محمود قریشی، اسد عمر، حماد اظہر، علی حیدر زیدی، عمر ایوب خان، مشیر خزانہ ڈاکٹر عبدالحفیظ شیخ، عبدالرزاق داؤد اور وزیرِاعلیٰ بلوچستان جام کمال خان نے بھی شرکت کی۔