معرکۂ حق میں ؛پاک فضائیہ نے عددی برتری رکھنے والے دشمن کو شکست دی:ایئر چیف

پی اے ایف اکیڈمی رسالپور میں کیڈٹس کی شاندار گریجویشن پریڈ کے موقع پر سربراہ پاک فضائیہ ایئر چیف مارشل ظہیر احمد بابر سدھو نے واضح پیغام دیا کہ “معرکۂ حق کی فتح تینوں افواج کی ہم آہنگی، جارحانہ فیصلہ سازی اور فیلڈ مارشل سید عاصم منیر کی قیادت کا نتیجہ ہے، اور اگر پاکستان کی قومی خودمختاری دوبارہ چیلنج کی گئی تو دشمن ایک کہیں زیادہ مضبوط اور بہتر تیار پاک فضائیہ کا سامنا کرے گا۔”

“پاک فضائیہ نے عددی برتری رکھنے والے دشمن کو شکست دی”

ایئر چیف نے کہا کہ حالیہ تصادم میں پاک فضائیہ نے اپنی روایتی میراث برقرار رکھتے ہوئے کم تعداد میں لڑنے کی صلاحیت ثابت کی اور دشمن کے جدید ترین طیارے مار گرائے۔ انہوں نے کہا کہ “دنیا نے اس سے پہلے فضائی طاقت کے اتنے جرات مندانہ اور مربوط استعمال کو نہیں دیکھا۔”

انہوں نے بتایا کہ 2025 میں بھی پاک فضائیہ نے ہر سطح پر پیشہ ورانہ برتری ثابت کی، اپنی آپریشنل ڈکٹرائن کو جدید جنگی تقاضوں کے مطابق ترتیب دیا اور مالی و تکنیکی محدودیت کے باوجود اسمارٹ انڈکشن پروگرام کے ذریعے جدید طیارے ریکارڈ وقت میں شامل کیے۔

“قومی سلامتی پر کوئی سمجھوتہ نہیں”

ایئر چیف مارشل نے کہا کہ پاکستان پرامن ملک ہے، مگر خودمختاری پر آنچ نہیں آنے دی جائے گی۔ “قوم اور مسلح افواج نے اتحاد کی مثال قائم کی اور دشمن کو اس کی عددی برتری کے باوجود شکست دی۔”
انہوں نے کہا کہ پاکستان کی قومی قیادت، افواج اور قوم ملک کی نظریاتی، جغرافیائی اور فضائی سرحدوں کے تحفظ کیلئے ہر قیمت چکانے کیلئے پرعزم ہیں۔

سعودی کیڈٹس کی شمولیت دوستی کی علامت

انہوں نے کہا کہ پریڈ میں سعودی کیڈٹس کی شرکت پاکستان اور سعودی عرب کی مضبوط عسکری شراکت داری کا ثبوت ہے۔ کیڈٹس کو مخاطب کرتے ہوئے انہوں نے کہا کہ “آپ کو مادرِ وطن کی فضائی حدود کے دفاع کی مقدس ذمہ داری سونپی گئی ہے۔ پوری قوم کی امیدیں آپ سے وابستہ ہیں۔”

رسالپور میں شاندار گریجویشن پریڈ

اصغر خان اکیڈمی میں ہونے والی پروقار پریڈ میں 151ویں جی ڈی پی، 97ویں انجینئرنگ، 108ویں ایئر ڈیفنس کورس، نیویگیشن الفا، ایڈمن و اسپیشل ڈیوٹیز اور 11ویں لاجسٹکس کورس کے کیڈٹس شامل تھے۔
تقریب میں رائل سعودی ایئر فورس کے 98 کیڈٹس نے بھی پاس آؤٹ کیا۔

لڑاکا طیاروں کی فلائی پاسٹ—جے ایف 17 اور جے 10سی کا جرات مندانہ مظاہرہ
پریڈ کے اختتام پر نمبر نائن اسکوارڈرن کے جانبازوں نے فلائی پاسٹ کیا۔ جے ایف 17 تھنڈر نے شاندار ہوائی حرکات دکھا کر شرکا کی توجہ سمیٹ لی جبکہ دنیا بھر میں “رافیل ہنٹر” کے نام سے مشہور جے 10سی طیاروں نے بھی شاندار فلائی پاسٹ کیا۔
اس موقع پر جی-10سی کوبراز کی جانب سے خصوصی سلامی بھی پیش کی گئی۔