آسٹریلوی اسٹار گلین میکسویل نے بھی آئی پی ایل سے کنارہ کشی اختیار کرلی

بھارت کی مشہور ترین کرکٹ لیگ آئی پی ایل ایک اور بڑے نام سے محروم ہوگئی۔ سابق جنوبی افریقی کپتان فاف ڈوپلیسی اور انگلش آل راؤنڈر معین علی کے بعد اب آسٹریلیا کے جارح مزاج آل راؤنڈر گلین میکسویل نے بھی لیگ کے آئندہ سیزن سے علیحدگی اختیار کرلی ہے۔

میکسویل نے خود کو رجسٹر نہ کروایا

بھارتی میڈیا کے مطابق آئی پی ایل کی منی آکشن کیلئے 1355 کھلاڑیوں نے رجسٹریشن کروائی ہے، تاہم اس فہرست میں گلین میکسویل کا نام شامل نہیں۔ رپورٹس کے مطابق آسٹریلوی آل راؤنڈر نے اپنے طور پر فیصلہ کیا ہے کہ وہ اس سال نیلامی میں حصہ نہیں لیں گے۔

آئی پی ایل نے مجھے نکھارا

اپنے بیان میں میکسویل نے کہا کہ آئی پی ایل میں ان کے کئی یادگار سیزنز رہے اور یہ مقابلہ انہیں “بطور کرکٹر اور بطور انسان نکھارنے کا سبب بنا”۔
انہوں نے کہا کہ عالمی معیار کے کھلاڑیوں کے ساتھ کھیلنا، بہترین فرنچائزز کی نمائندگی کرنا اور جنون سے بھرپور بھارتی شائقین کے سامنے پرفارم کرنا اُن کیلئے اعزاز تھا۔

میکسویل نے اپنے چاہنے والوں کا شکریہ ادا کرتے ہوئے کہا کہ “یہ یادیں، یہ چیلنجز اور بھارت کی توانائی ہمیشہ میرے دل میں جگہ رکھے گی۔ سالوں سے ملنے والی محبت پر شکر گزار ہوں، اُمید ہے جلد دوبارہ ملاقات ہو گی۔”

فرنچائزز میں ناکام سیزنز

رائل چیلنجرز بنگلورو کی جانب سے مختصر عرصے میں اہم کردار ادا کرنے کے بعد ایک خراب سیزن انہیں مہنگا پڑا اور فرنچائز نے انہیں ریلیز کردیا۔
2025 کے میگا آکشن میں پنجاب کنگز نے انہیں خریدا، تاہم وہاں بھی مایوس کن کارکردگی کے باعث فائنلسٹ ٹیم نے انہیں برقرار نہیں رکھا۔

رپورٹس کے مطابق پنجاب کنگز سے ریلیز ہونے کے بعد میکسویل نے آئی پی ایل منی آکشن کیلئے رجسٹریشن ہی نہیں کرائی، جس کے باعث امکان ہے کہ وہ 2026 کا ایڈیشن بھی نہ کھیلیں۔

دیگر بڑے کھلاڑی بھی روانہ

واضح رہے کہ فاف ڈوپلیسی اور معین علی بھی حال ہی میں آئی پی ایل چھوڑ کر پاکستان سپر لیگ (پی ایس ایل) میں شمولیت کا اعلان کر چکے ہیں، جس کے بعد آئی پی ایل مسلسل بڑے ناموں سے محروم ہوتی جا رہی ہے۔