ٹام کروز کے 45 سالہ کیریئر کا سنگِ میل، پہلی بار اعزازی آسکر اپنے نام کرلیا

ہالی وڈ کے سپر اسٹار ٹام کروز کو 45 سالہ فلمی کیریئر میں پہلی مرتبہ آسکر ایوارڈ مل گیا ہے۔ انہیں بہترین اداکاری پر نہیں بلکہ فلمی صنعت میں غیر معمولی خدمات کے اعتراف میں اعزازی آسکر دیا گیا۔

لاس اینجلس میں شاندار تقریب

لاس اینجلس میں منعقدہ  سالانہ گورنرز ایوارڈز کی تقریب میں اکیڈمی آف موشن پکچر آرٹس اینڈ سائنسز نے ٹام کروز کو ان کی شاندار فلمی خدمات، مستقل مزاجی اور سینما کے لیے بے مثال تعاون پر اعزازی آسکر پیش کیا۔ اس دوران ہال میں موجود مہمانوں نے تقریباً ایک منٹ تک کھڑے ہو کر ٹام کروز کو زبردست خراجِ تحسین پیش کیا، جو ان کے چار دہائیوں سے زائد طویل فلمی سفر کی عالمی سطح پر بھرپور پذیرائی کا ثبوت تھا۔

پہلا آسکر

تریسٹھ  سالہ ٹام کروز اپنے کیریئر میں چار بار آسکر کے لیے نامزد ہو چکے تھے لیکن کبھی ایوارڈ حاصل نہ کر سکے۔ اس تاریخی لمحے پر اپنے جذبات کا اظہار کرتے ہوئے انہوں نے کہا کہ فلمیں بنانا اُن کے لیے صرف پیشہ نہیں بلکہ ان کی شناخت کا حصہ ہے۔ انہوں نے اپنے 45 سالہ سفر میں ساتھ کام کرنے والے ساتھی اداکاروں، ہدایتکاروں اور پوری فلم ٹیم کا شکریہ ادا کرتے ہوئے کہا کہ یہ کامیابی ان سب کی مشترکہ محنت کا نتیجہ ہے۔

دیگر اعزازی ایوارڈ

اعزازی آسکر حاصل کرنے والوں میں اس سال ٹام کروز کے ساتھ مشہور کوریوگرافر ڈیبی ایلن، ویژنری پروڈکشن ڈیزائنر وین تھامس اور عالمی شہرت یافتہ گلوکارہ ڈولی پارٹن بھی شامل ہیں، جنہیں فلم اور فن کی دنیا میں نمایاں خدمات پر یہ اعزاز دیا گیا۔

کیریئر کی نمایاں جھلکیاں

ٹام کروز کا شمار دنیا کے کامیاب ترین اداکاروں میں ہوتا ہے، جنہوں نے ٹاپ گن، مشن امپاسیبل سیریز، رین مین، جیری میگوائر، وارؤف دی ورلڈز، ایج آف ٹومارو اور دیگر درجنوں بلاک بسٹر فلموں کے ذریعے عالمی سطح پر بے مثال شہرت حاصل کی۔