روہت شرما نے شاہد آفریدی کاسب سے زیادہ چھکے لگانے والے ورلڈ ریکارڈ توڑ دیا

بھارتی اوپنر روہت شرما نے جنوبی افریقا کے خلاف ون ڈے سیریز کے پہلے میچ میں تاریخی سنگِ میل عبور کر لیا، جہاں انہوں نے سابق پاکستانی آل راؤنڈر شاہد آفریدی کا طویل عرصے سے قائم ون ڈے میں سب سے زیادہ چھکوں کا ورلڈ ریکارڈ توڑ دیا۔ روہت شرما کے مجموعی چھکوں کی تعداد اب 352 ہو گئی ہے، جبکہ آفریدی نے اپنے کیریئر میں 351 چھکے لگائے تھے۔

ریکارڈ ٹوٹ گیا

پہلے ون ڈے میں 57 رنز کی اننگ کھیلنے والے روہت شرما نے تین بلند و بالا چھکے جڑے، جس کے ساتھ ہی انہوں نے 269 اننگز میں 352 چھکے مکمل کیے۔ اس فہرست میں آفریدی دوسرے نمبر پر چلے گئے، جنہوں نے 369 اننگز میں 351 چھکے لگائے تھے۔
تیسرے نمبر پر ویسٹ انڈیز کے کرس گیل موجود ہیں، جن کے نام 294 اننگز میں 331 چھکے درج ہیں۔

 زیادہ چھکوں کا اعزاز برقرار

ون ڈے کے ساتھ ساتھ روہت شرما ٹیسٹ اور ٹی ٹوئنٹی میچز کو ملا کر انٹرنیشنل کرکٹ میں مجموعی طور پر سب سے زیادہ چھکے لگانے کا ریکارڈ پہلے ہی اپنے نام رکھتے ہیں۔ 38 سالہ بھارتی بلے باز کے چھکوں کی مجموعی تعداد 645 ہو چکی ہے۔
اس فہرست میں کرس گیل 553 چھکوں کے ساتھ دوسرے اور شاہد آفریدی 476 چھکوں کے ساتھ تیسرے نمبر پر ہیں۔

 پاور ہٹنگ کو نئی شناخت

ماہرین کے مطابق روہت شرما کی پاور ہٹنگ نے انہیں عالمی کرکٹ کے سب سے خطرناک اوپنرز میں شامل کر دیا ہے۔ مسلسل بڑے شاٹس، خاص طور پر ون ڈے کرکٹ میں، انہیں جدید دور کے منفرد بلے بازوں میں شمار کراتے ہیں۔