ادارے حدود سے تجاوز کریں تو ملک نا صرف کمزور بلکہ ٹوٹ بھی سکتا ہے، جسٹس قاضی فائز عیسیٰ

کراچی: سپریم کورٹ کے جج جسٹس قاضی فائز عیسیٰ کا کہنا ہے کہ ادارے حدود سے تجاوز کریں تو ملک نہ صرف کمزور پڑ جاتے ہیں بلکہ ٹوٹ بھی سکتے ہیں۔

جسٹس قاضی فائز عیسیٰ نے کراچی میں تقریب سے خطاب کے دوران کہا کہ قائد اعظم محمد علی جناحؒ نے یہ واضح کیا تھا کہ پاکستان ایک جمہوری ملک ہوگا، ملکی آئین میں درج ہے کہ جمہوریت کو قائم رکھنا ایک فریضہ ہے، جمہوری اصولوں پرگامزن رہنے سے ملکی سالمیت برقرار رہے گی۔ جمہوریت کو نظرانداز کرنے کے نتیجے میں ہم آدھے پاکستان سے محروم ہوچکے۔

جسٹس قاضی فائز عیسیٰ کا کہنا تھا کہ مجھ سمیت صدر پاکستان، وزیراعظم، وزراء اور افواج پاکستان کے ہرسپاہی پر آئین اور حلف کی پاسداری لازم ہے۔ تاریخ بتاتی ہے کہ جب ادارے اختیار سے تجاوز کرتے ہیں تو ملک نا صرف کمزور بلکہ ٹوٹ بھی سکتا ہے، عدلیہ کو بھی چاہیے کہ وہ اپنے دائرہ اختیار سے تجاوز نہ کرے۔