وزیرِ اعلیٰ خیبر پختونخوا علی امین گنڈاپور کے خلاف دہشت گردی کی دفعہ کے تحت مقدمہ درج

لاہور کے مناواں تھانے میں وزیرِ اعلیٰ خیبر پختونخوا علی امین گنڈاپور کے خلاف دہشت گردی کی دفعہ کے تحت مقدمہ درج کر لیا گیا ہے۔

مناواں پولیس کے ایس ایچ او ہڈیارہ حماس حمید کی مدعیت میں درج مقدمے کے متن کے مطابق علی امین گنڈا پور 300 افراد کے ہمراہ ون وے کی خلاف ورزی کرتے ہوئے آئے اور انہوں نے اے کے 47 رائفل کی مدد سے سیالکوٹ انٹرچینج پر گاڑیوں پر حملہ کیا۔

ایف آئی آر کے مطابق مسلح گروہ نے شہریوں کی گاڑیوں کو توڑا اور علی امین گنڈاپور اور شاہد خٹک توڑ پھوڑ کے لیے لوگوں کو اکساتے رہے۔

واضح رہے کہ 22 اگست لاہور میں تحریکِ انصاف کے جلسے میں شرکت کے لیے وزیرِ اعلیٰ خیبر پختونخوا علی امین گنڈاپور قافلے کی صورت میں بذریعہ موٹروے لاہور پہنچے تھے۔

ان کے خلاف درج مقدمے کے متن کے مطابق بلوائیوں نے ٹول پلازہ کے کیبن، بیریرز اور سی سی ٹی وی کیمرے توڑ دیے اور حملے کے دوران متعدد پولیس اہلکار زخمی بھی ہوئے۔

ایف آئی آر کے مطابق علی امین گنڈاپور اور شاہد خٹک جان سے مارنے کی دھمکیاں دیتے ہوئے فرار ہوگئے۔

مزید خبروں کیلئے وزٹ کریں