پیپلز پارٹی کی تاریخی انتخابی مہم نے قومی قیادت کو گلگت آنے پرمجبورکردیا،بلاول بھٹو

 گلگت:پاکستان پیپلزپارٹی کے چیئرمین بلاول بھٹو زرداری نے کہاکہ  پیپلز پارٹی کے جیالوں نے  تاریخی الیکشن مہم سے پاکستان کی قومی قیادت کو  گلگت  بلتستان آنے پر مجبور کر دیا ہے۔ وفاقی وزرا اور دوسری جماعتیں بھی یہاں آرہی ہیں،یہ جیالوں کی اور پاکستان پیپلزپارٹی کی کامیابی ہے۔ بلاول  بھٹو نے عوام سے کہاکہ پورا پاکستان آپ سے ووٹ اور ساتھ مانگنے کے لیے پھر رہا ہے جو میرے جیالوں کی جیت ہے ، اسی محنت کو جاری رکھنا ہے، 15 نومبر ہمارے امتحان کا دن ہے۔

گلگت میں کارکنوں سے خطاب کرتے ہوئے بلاول بھٹو زرداری نے کہا کہ 15 تاریخ کو فیصلہ ہوگا کہ گلگت بلتستان کے عوام کو حق ملکیت، نوجوانوں کو حق روزگار ملتا ہے یا نہیں۔ اس الیکشن کے بعد سب کہنا شروع کردیں گے کہ  جو گلگت بلتستان میں حکومت بناتا ہے  اسی کی پاکستان میں  بھی  حکومت  ہوگی ۔ پورے پاکستان کو نظر آرہا ہے کہ آپ جیت رہے ہیں لیکن سازشی عناصر اپنا کام جاری رکھے ہوئے ۔ہم سب مل کر گلگت بلتستان کے مسائل حل کریں گے، 13 نومبر کو جلسہ ہوگا اور 15 نومبر کو جیت کا جشن منائیں گے۔ گلگت سے ہمارا تین نسلوں کا پرانا رشتہ ہے ہم اسے قائم رکھیں گے اور بھٹو شہید اور بی بی شہید کا نامکمل مشن پورا کریں گے۔

 واضح رہے کہ بلاول بھٹو زرداری پی پی پی کی انتخابی مہم کے سلسلے میں گزشتہ ماہ ہی گلگت بلتستان پہنچے تھے اور 15 نومبر کو انتخابات کے بعد واپس آئیں گے۔