ڈیرہ غازی خان: پولیس نے خوارجی دہشت گردوں کا حملہ پسپا کر دیا

پنجاب پولیس نے ڈیرہ غازی خان کے سرحدی تھانہ وہوا کی جھنگی چیک پوسٹ پر خوارجی دہشت گردوں کے بڑے حملے کو ناکام بنا دیا۔ پولیس ترجمان کے مطابق، دہشت گردوں نے رات کی تاریکی کا فائدہ اٹھاتے ہوئے 20 سے 25 دہشت گردوں پر مشتمل گروہ کے ساتھ جھنگی پولیس چیک پوسٹ پر مختلف اطراف سے حملہ کیا۔

دہشت گردوں نے راکٹ لانچرز اور جدید خودکار اسلحہ کا استعمال کیا۔

پولیس ترجمان نے مزید بتایا کہ چوکی پر تعینات پنجاب پولیس کے اہلکاروں نے زبردست مزاحمت کی اور جوابی فائرنگ سے حملہ ناکام بنا دیا۔

جوابی کارروائی کے نتیجے میں دہشت گرد پسپا ہو کر فرار ہو گئے، اور پولیس کو اطلاع ملی ہے کہ حملے میں دہشت گردوں کو جانی نقصان پہنچا۔

پنجاب پولیس کے آر پی او ڈیرہ غازی خان، سجاد منج نے اس آپریشن کی قیادت کی، اور ڈی پی او ڈیرہ غازی خان سید علی بھی موقع پر موجود تھے۔

مفرور دہشت گردوں کی تلاش کے لیے علاقے میں سرچ آپریشن جاری ہے۔

آئی جی پنجاب، ڈاکٹر عثمان انور نے خوارجی دہشت گردوں کے حملے کو ناکام بنانے پر ڈیرہ غازی خان پولیس کو شاباش دی۔

آئی جی نے کہا کہ جھنگی پولیس چیک پوسٹ کو پنجاب حکومت کی فنڈنگ سے مزید محفوظ بنایا جا چکا ہے، اور چیک پوسٹ پر اضافی نفری، جدید آلات اور اسلحہ پہلے ہی فراہم کیا جا چکا ہے۔

آئی جی پنجاب نے مزید کہا کہ پنجاب پولیس کے بہادر سپاہی ملک و قوم کے دشمنوں کے سامنے سیسہ پلائی دیوار کی مانند ہیں، جو کسی بھی حالت میں دشمن کی سازشوں کو ناکام بنانے میں کامیاب رہیں گے۔