سیلابی خطرات بڑھ گئے، شہباز شریف کی این ڈی ایم اے کو 24 گھنٹے الرٹ رہنے کی ہدایت

وزیراعظم محمد شہباز شریف، جو اس وقت دورۂ چین کے دوران بیجنگ میں موجود ہیں، نے دریاؤں میں بڑھتی ہوئی طغیانی کے پیش نظر نیشنل ڈیزاسٹر اینڈ مینجمنٹ اتھارٹی (این ڈی ایم اے) کو ہنگامی بنیادوں پر تیاری مکمل رکھنے کی ہدایت کی ہے۔ انہوں نے بدھ کے روز بیجنگ سے چیئرمین این ڈی ایم اے کو ٹیلی فون کرکے تازہ صورتحال دریافت کی اور ریسکیو و ریلیف سرگرمیوں پر بریفنگ لی۔

سیلابی صورتحال پر تفصیلی بریفنگ
چیئرمین این ڈی ایم اے نے وزیراعظم کو دریائے راوی، چناب اور ستلج میں بڑھتے ہوئے پانی کے بہاؤ کے بارے میں تفصیل سے آگاہ کیا۔ انہوں نے بتایا کہ کئی مقامات پر پانی کی سطح خطرناک حدوں کو چھو رہی ہے اور نشیبی علاقے براہِ راست متاثر ہو رہے ہیں۔ این ڈی ایم اے نے اب تک کے اقدامات، متاثرہ علاقوں میں امدادی کارروائیوں اور ممکنہ خطرات کے بارے میں بھی وزیراعظم کو آگاہ کیا۔

وزیراعظم کی واضح ہدایات
وزیراعظم نے این ڈی ایم اے کو حکم دیا کہ وہ صوبائی حکومتوں اور ضلعی انتظامیہ کے ساتھ مکمل تعاون کرے اور حفاظتی اقدامات کے ساتھ ساتھ ریسکیو و ریلیف سرگرمیوں کو تیز کرے تاکہ جانی و مالی نقصان کو کم سے کم رکھا جا سکے۔ انہوں نے زور دیا کہ ریسکیو ٹیمیں پیشگی تیاری مکمل رکھیں اور متاثرہ عوام کی فوری مدد یقینی بنائی جائے۔

عوام کو پیشگی آگاہی کی ہدایت
وزیراعظم نے یہ بھی ہدایت کی کہ دریائے راوی، چناب اور ستلج میں بڑھتی طغیانی کے حوالے سے عوام کو پیشگی طور پر آگاہ کیا جائے تاکہ لوگ بروقت محفوظ مقامات کی طرف منتقل ہو سکیں۔ وزیراعظم آفس کے مطابق، حکومت تمام اداروں کے ساتھ مل کر اس ہنگامی صورتحال سے نمٹنے کے لیے بھرپور اقدامات کر رہی ہے۔

فلاحی اداروں اور عوام سے تعاون کی اپیل
وزیراعظم شہباز شریف نے کہا کہ حکومت عوام کی حفاظت کے لیے ہر ممکن اقدام کر رہی ہے لیکن یہ وقت اجتماعی تعاون کا تقاضا کرتا ہے۔ انہوں نے فلاحی اداروں، رضاکاروں اور عوام سے اپیل کی کہ وہ ریسکیو ٹیموں کے ساتھ تعاون کریں تاکہ مشکل کی یہ گھڑی کم سے کم نقصان کے ساتھ گزاری جا سکے۔