عمران خان اکیلا مجرم نہیں، اسے لانے والے بھی شریک ہیں:نواز شریف

مسلم لیگ ن کے صدر اور سابق وزیر اعظم نواز شریف نے کہا ہے کہ ضمنی انتخابات میں عوام نے کارکردگی کی بنیاد پر فیصلہ دیا، جبکہ جھوٹ، گالم گلوچ اور بدتہذیبی کی سیاست کو مسترد کردیا۔ انہوں نے عمران خان اور ان کے پشت پناہوں کو ملک کی تباہی کا ذمہ دار قرار دیا۔

عوام نے بدتہذیبی کو شکست دی

لاہور میں ضمنی انتخابات میں کامیاب ہونے والے نومنتخب اراکین اسمبلی سے خطاب کرتے ہوئے نواز شریف نے کہا کہ اللہ کے فضل سے جھوٹ، گالم گلوچ اور فتنے کی سیاست کو ہار ملی۔انہوں نے کہا کہ الیکشن کا بائیکاٹ کرنے والے خود ہی حصہ لے کر شکست کھا گئے۔

پی ٹی آئی پر شدید تنقید

نواز شریف کا کہنا تھا کہ گزشتہ حکومت میں ایک بھی ترقیاتی منصوبہ شروع نہیں ہوا، ملک میں صرف تباہی اور بدتہذیبی آئی۔انہوں نے کہا کہ خارجہ امور کا دیوالیہ نکال دیا گیا، میرٹ کی دھجیاں اڑائی گئیں اور ملک دیوالیہ ہونے کے قریب پہنچ گیا۔ان کے مطابق ترقی کی رفتار برقرار رہتی تو آج پاکستان کا دنیا میں ایک مختلف مقام ہوتا۔

ہم نے پاکستان کو بچایا

مسلم لیگ ن کے صدر نے دعویٰ کیا کہ ڈیڑھ سال میں حکومت نے عوامی خدمت کا ریکارڈ قائم کیا، مہنگائی کی شرح میں کمی لائی اور پاکستان کو ڈیفالٹ سے بچایا۔
انہوں نے کہا کہ آج ہر محکمہ میرٹ پر کام کر رہا ہے اور وفاقی و صوبائی حکومتیں دن رات محنت کر رہی ہیں۔

عمران خان اکیلا مجرم نہیں

نواز شریف نے کہا کہ عمران خان وہ واحد شخص نہیں جس نے ملک کو نقصان پہنچایا، بلکہ ’’اسے لانے والے بھی برابر کے شریک ہیں‘‘۔انہوں نے کہا کہ دوسروں کو چور قرار دینے والے خود چور ثابت ہوئے، اور فتنہ و فساد کے ماحول میں کوئی قوم ترقی نہیں کرتی۔

 امن کی صورتحال

انہوں نے بتایا کہ پنجاب میں غریبوں کے لیے ایک لاکھ 20 ہزار گھر تعمیر کیے جا رہے ہیں، اسپتال بن رہے ہیں، مفت علاج کی سہولیات فراہم کی جا رہی ہیں اور ہر ضلع میں گرین بسیں چل رہی ہیں۔ان کا کہنا تھا کہ ’’پنجاب میں امن و امان کی صورتحال پہلے سے بہت بہتر ہوچکی ہے‘‘۔

ضمنی انتخابات میں ن لیگ کی کامیابی

واضح رہے کہ اتوار کو ہونے والے ضمنی انتخابات میں مسلم لیگ ن قومی اسمبلی کی تمام 6 نشستوں پر کامیاب ہوئی، جبکہ صوبائی اسمبلی کی 7 میں سے 6 نشستیں بھی ن لیگ نے حاصل کیں۔