عمران خان کی تیسری عید اڈیالہ جیل میں، نماز عید میں شرکت نہ کر سکے

پاکستان تحریک انصاف (پی ٹی آئی) کے بانی عمران خان اس بار مسلسل تیسری عید اڈیالہ جیل میں گزار رہے ہیں۔ سیکیورٹی وجوہات کے باعث انہیں جیل سے باہر جا کر نماز عید ادا کرنے کی اجازت نہیں دی گئی۔

اڈیالہ جیل کی مرکزی جامع مسجد میں نماز عید کا اجتماع منعقد ہوا، جس میں قیدیوں، حوالاتیوں اور جیل افسران کی بڑی تعداد نے شرکت کی، تاہم عمران خان اور ان کی اہلیہ بشریٰ بی بی اپنے اپنے سیل میں بند رہے اور نماز عید میں شامل نہ ہو سکے۔

جیل ذرائع کے مطابق عمران خان نے اس عید کے موقع پر تاحال نئے کپڑے نہیں پہنے اور وہ جیل میں اپنی موجودہ حالت میں ہی عبادات انجام دے رہے ہیں۔

دوسری جانب، جیل حکام نے بتایا کہ عید کے روز بھی جیل میں سکیورٹی اور دیگر انتظامات معمول کے مطابق برقرار رکھے گئے تاکہ کسی بھی غیر معمولی صورتحال سے بچا جا سکے۔