امریکی ٹیرف پر مذاکرات، پاکستانی وفد کو اہم ذمہ داریاں سونپ دی گئیں

اسلام آباد: وزیراعظم شہباز شریف کی زیر صدارت ملکی برآمدات میں اضافے اور امریکا کی جانب سے درآمدات پر عائد کیے گئے نئے ٹیرف سے متعلق اعلیٰ سطحی جائزہ اجلاس منعقد ہوا۔ اجلاس میں امریکی ٹیرف، سٹیئرنگ کمیٹی اور ورکنگ گروپ کی رپورٹ پر بریفنگ دی گئی اور مستقبل کے لائحہ عمل پر تبادلہ خیال کیا گیا۔

اجلاس کو بتایا گیا کہ امریکا میں پاکستانی سفارتخانہ مسلسل امریکی حکام سے رابطے میں ہے تاکہ اس معاملے پر باہمی طور پر مفید حل نکالا جا سکے۔ وزیراعظم نے اس حوالے سے امریکا کے ساتھ مذاکرات کے لیے ایک وفد تشکیل دینے کی ہدایت کی، جس میں معروف کاروباری شخصیات اور برآمد کنندگان کو بھی شامل کیا جائے گا۔

وزیراعظم شہباز شریف نے اس موقع پر کہا کہ پاکستان اور امریکا کے تجارتی تعلقات دہائیوں پر محیط ہیں، اور حکومت ان تعلقات کو مزید مستحکم بنانے کے لیے پرعزم ہے۔ انہوں نے ہدایت کی کہ امریکا کے ساتھ تجارتی شراکت داری کو مزید وسعت دینے کے لیے مؤثر حکمت عملی تیار کی جائے تاکہ پاکستانی برآمدات کو فروغ دیا جا سکے۔

اجلاس میں نائب وزیراعظم و وزیرِ خارجہ اسحاق ڈار، وفاقی وزراء احد خان چیمہ، محمد اورنگزیب، علی پرویز ملک، مشیر وزیراعظم سید توقیر شاہ، معاونین خصوصی طارق فاطمی، ہارون اختر، وزیراعظم کے کوآرڈینیٹر رانا احسان افضل اور دیگر اعلیٰ حکام نے شرکت کی۔