ہم اسرائیلی فوج کا غزہ میں بچوں کا ہولوکاسٹ دیکھ رہے ہیں،وزیر اعظم پاکستان

 اسلام آباد:نگراں وزیراعظم انوار الحق کاکڑ نے کہا ہے کہ پیشہ ور فوج کبھی بچوں کو نشانہ نہیں بناتی لیکن ہم اسرائیلی فوج کا غزہ میں بچوں کا ہولوکاسٹ دیکھ رہے ہیں، ہم غزہ کے بچوں کے سامنے شرمندہ ہیں۔

اسلام آباد میں منعقدہ تقریب سے خطاب کرتے ہوئے نگراں وزیراعظم انوار الحق کاکڑ نے کہا کہ حکومت بچوں کے حقوق کے تحفظ کے لیے پرعزم ہے، معاشرے کے تمام طبقات کی ذمہ داری ہے کہ وہ بچوں کی بہتری کے لیے کام کریں اور حکومت بھی بچوں کی فلاح و بہبود کے لیے ہر ممکن قدم اٹھا رہی ہے۔

نگران وزیر اعظم پاکستان نے کہاکہ اس وقت غزہ کے بچے میرے ذہن میں ہیں، ہم غزہ کے بچوں کے سامنے شرمندہ ہیں،ہم غزہ میں فلسطینی بچوں کا ہولوکاسٹ دیکھ رے ہیں اس ہولوکاسٹ کو فوری طور پر روکا جائے غزہ ہونے میں ہونے والے اس ظلم کو مذہبی رنگ سے ہٹ کر انسانی حقوق کے تناظر میں دیکھا جائے۔ انہوں نے کہاکہ غزہ میں بچوں کا قتل عام کیا جارہا ہے حالاںکہ جنگ میں پیشہ ور فوج کبھی نہتے شہریوں اور بچوں کو نشانہ نہیں بناتی لیکن اسرائیلی فوجی غزہ میں نہتے بچوں کو قتل کر رہے ہیں، نہتے بچوں کا قتل عالمی قوانین اور انسانی حقوق کی شدید خلاف ورزی ہے۔

وزیراعظم کا مزید کہنا تھا کہ فلسطین میں پیدا ہونے والی صورتحال مستقبل کے تنازعات کی اہم وجہ بنے گی۔