وزیراعلیٰ پنجاب مریم نواز کا سیلاب متاثرین کے لیے جامع بحالی پیکیج کا اعلان جلد متوقع

وزیراعلیٰ پنجاب مریم نواز شریف نے سیلاب متاثرین کی بحالی کے لیے ایک جامع اور فوری پیکیج کی تیاری کی ہدایت دے دی۔ اس سلسلے میں ان کی زیر صدارت طویل اجلاس منعقد ہوا جس میں اربن یونٹ، بورڈ آف ریونیو اور دیگر اہم محکموں کے حکام شریک ہوئے۔ وزیراعلیٰ نے واضح کیا کہ بحالی پیکیج میں امدادی رقوم کو بڑھایا جائے تاکہ متاثرین کو فوری سہولت فراہم کی جا سکے۔

کاشتکاروں کے لیے خصوصی بحالی پروگرام
مریم نواز شریف نے سیلاب سے متاثرہ کاشتکاروں کے لیے خصوصی بحالی پروگرام ترتیب دینے کی ہدایت بھی دی۔ انہوں نے کہا کہ سیلاب نے سب سے زیادہ نقصان کاشتکار طبقے کو پہنچایا ہے، لہٰذا ان کی بحالی کو ترجیح دی جائے گی تاکہ وہ دوبارہ اپنی زرعی سرگرمیاں بحال کر سکیں۔

سروے کا عمل اور شفاف طریقہ کار
وزیراعلیٰ نے ہدایت کی کہ متاثرہ خاندانوں کا سروے جلد مکمل کیا جائے اور اس عمل کے لیے شفاف ترین طریقہ کار اپنایا جائے۔ اس مقصد کے لیے ڈیجیٹل ریکارڈنگ کا نظام متعارف کرایا جائے گا۔ انہوں نے ایک اعلیٰ سطح کمیٹی قائم کر دی جو سروے پراجیکٹ کی براہ راست نگرانی کرے گی۔

عارضی رہائش گاہوں کا انتظام
اجلاس میں فیصلہ کیا گیا کہ جن خاندانوں کے گھر مکمل طور پر تباہ ہو گئے ہیں اور وہ واپس نہیں جا سکتے، ان کے لیے ہر ضلع میں عارضی مارکیز قائم کی جائیں گی۔ ان مارکیز میں مرد و خواتین کے لیے علیحدہ جگہیں مختص کی جائیں گی جبکہ صاف پانی، کھانے پینے اور دیگر ضروری سہولتوں کا انتظام بھی کیا جائے گا تاکہ متاثرین کو سردیوں سے قبل محفوظ پناہ گاہ فراہم کی جا سکے۔

’اپنی چھت، اپنا گھر‘ پروگرام شامل
مریم نواز شریف نے سیلاب متاثرین کے گھروں کی بحالی کے لیے “اپنی چھت، اپنا گھر” پروگرام کو بحالی پیکیج میں شامل کرنے کا فیصلہ کیا۔ انہوں نے کہا کہ سیلاب متاثرین کے گھروں کی بحالی تک وہ سکون سے نہیں بیٹھیں گی اور متاثرہ خاندانوں کو ہر ممکن تعاون فراہم کیا جائے گا۔

آبی گزرگاہوں سے تجاوزات ختم کرنے کا فیصلہ
وزیراعلیٰ پنجاب نے دریاؤں اور ندی نالوں کی آبی گزرگاہوں کو ریڈ زون قرار دینے اور وہاں سے تجاوزات و غیرقانونی آبادیاں ختم کرنے کا اعلان کیا۔ ان کا کہنا تھا کہ مستقبل میں سیلابی خطرات سے بچاؤ کے لیے یہ اقدام ناگزیر ہے۔

ماسٹر پلان کی ضرورت پر زور
مریم نواز شریف نے کہا کہ پنجاب میں فلڈ اور دیگر آفات سے بچاؤ کے لیے ایک ماسٹر پلان کی اشد ضرورت ہے۔ انہوں نے ہدایت کی کہ طویل المدتی اور قلیل المدتی پالیسیوں کے تحت ایسا نظام بنایا جائے جو مستقبل میں نقصانات کو کم سے کم کر سکے۔

سیلاب متاثرین سے ہمدردی اور عزم
وزیراعلیٰ نے کہا کہ لوگوں کے گھر اجڑ گئے ہیں اور وہ سکون سے نہیں بیٹھ سکتیں۔ انہوں نے مزید کہا کہ متاثرین کی توقعات ان سے جڑی ہیں اور ان توقعات پر پورا اترنا ان کا اعزاز اور ذمہ داری ہے۔ پنجاب حکومت ہر ممکن اقدامات کرے گی تاکہ متاثرین کی زندگیوں میں جلد بہتری آئے۔