پنجاب حکومت کا ماحولیات کے تحفظ کے لیے اہم قدم: ماحولیاتی تحفظ فورس کی پاسنگ آؤٹ پریڈ

لاہور میں ماحولیاتی تحفظ فورس پنجاب کی پاسنگ آؤٹ پریڈ تقریب کا انعقاد کیا گیا جس میں وزیراعلیٰ پنجاب مریم نواز شریف نے خصوصی طور پر شرکت کی۔ اس موقع پر سینئر صوبائی وزیر مریم اورنگزیب اور صوبائی وزیر اطلاعات عظمیٰ بخاری بھی موجود تھیں۔

تقریب کے دوران، وزیراعلیٰ پنجاب مریم نواز نے ماحولیاتی تحفظ فورس کی بنیاد رکھی۔ اس موقع پر پرچم کشائی کی گئی اور قومی ترانہ بھی بجایا گیا۔ فورس کے ویجیلینس سکواڈ نے وزیراعلیٰ مریم نواز کو سلامی پیش کی۔

سینئر صوبائی وزیر مریم اورنگزیب نے خطاب کرتے ہوئے کہا کہ “ماحولیاتی تحفظ فورس کا قیام وقت کی ضرورت تھی۔ یہ فورس ماحولیاتی تحفظ کے لیے وزیراعلیٰ مریم نواز کے عزم کی عکاسی کرتی ہے۔ پنجاب حکومت نے پہلے دن سے ہی ماحول کے تحفظ کے لیے اقدامات اٹھائے ہیں۔”

انہوں نے کہا کہ “پہلے کسی بھی حکومت نے ماحولیات کے تحفظ پر کام نہیں کیا تھا، اور میں سیکرٹری ماحولیات اور ڈی جی ای پی اے کو شاباش دینا چاہتی ہوں۔ اس محکمے میں وسائل دینا بھی ایک بڑی بات ہے۔”

مریم اورنگزیب نے مزید کہا کہ “ماحولیاتی تحفظ کے لیے وزیراعلیٰ مریم نواز کے وژن کو ایک سال میں عملی جامہ پہنایا گیا۔ پنجاب کی تاریخ میں پہلی بار ماحولیاتی تحفظ کے لیے خطیر رقم مختص کی گئی ہے۔ اس فورس کو جدید آلات سے لیس کیا گیا ہے۔”