امریکی ہتھیاروں کا دہشت گردوں کے ہاتھ لگنا تشویشناک ہے: دفتر خارجہ

اسلام آباد: دفتر خارجہ کے ترجمان شفقت علی خان نے ہفتہ وار بریفنگ میں کہا ہے کہ افغانستان میں چھوڑے گئے امریکی جدید ہتھیار دہشت گردوں کے استعمال میں آ رہے ہیں اور یہ ہتھیار پاکستان میں دہشت گردی کے لیے استعمال ہو رہے ہیں۔ پاکستان کو افغانستان میں دہشت گردوں کی محفوظ پناہ گاہوں پر شدید تحفظات ہیں۔

امریکا سے جلا وطن ہونے والے 8 پاکستانی وطن واپس پہنچ گئے

ترجمان دفتر خارجہ نے بتایا کہ 8 پاکستانی امریکا سے جلا وطن ہو کر پاکستان پہنچے ہیں۔ ان کی شناخت اور دیگر تفصیلات کے حوالے سے ایف آئی اے اور وزارت داخلہ آگاہ کر سکتی ہیں۔ پاکستان ان شہریوں کی وطن واپسی میں سہولت فراہم کر رہا ہے۔

پاک امریکا تعلقات اور ایف 16 پروگرام

شفقت علی خان نے کہا کہ پاکستان اور امریکا کے درمیان دیرینہ سفارتی تعلقات قائم ہیں، اور ایف 16 پروگرام ان تعلقات کا ایک اہم حصہ ہے۔ امریکا کی جانب سے ایف 16 پروگرام سے متعلق حالیہ فیصلے کو پاکستان مثبت پیش رفت سمجھتا ہے۔

اماراتی ولی عہد کا پاکستان کا پہلا دورہ

انہوں نے بتایا کہ وزیراعظم شہباز شریف کی دعوت پر ابوظہبی کے ولی عہد شیخ خالد بن محمد بن زاید النہیان نے پاکستان کا پہلا دورہ کیا۔ اس دورے میں پانچ مفاہمتی یادداشتوں پر دستخط ہوئے، اور ولی عہد کے ہمراہ ایک اعلیٰ سطحی وفد بھی آیا تھا۔

وزیراعظم کے دورے اور سفارتی سرگرمیاں

ترجمان دفتر خارجہ نے بتایا کہ وزیراعظم شہباز شریف نے آذربائیجان کے صدر الہام علیوف اور ازبکستان کے صدر شوکت میرازائیو کی دعوت پر دونوں ممالک کے دورے کیے۔ اس کے علاوہ اماراتی وزیراعظم کی دعوت پر وزیر خارجہ اسحاق ڈار نے اپنے ہم منصب سے ملاقات کی۔

بھارتی بیانات کشمیر میں جرائم نہیں چھپا سکتے

شفقت علی خان کا کہنا تھا کہ بھارتی حکومت کے بیانات مقبوضہ کشمیر میں اس کے جرائم اور بربریت کو چھپانے میں کامیاب نہیں ہو سکتے۔ پاکستان ہمیشہ کشمیری عوام کے حق خودارادیت کی حمایت جاری رکھے گا۔

سعودی عرب کی ویزا پابندیوں سے متعلق وضاحت

انہوں نے مزید کہا کہ سعودی عرب کی جانب سے پاکستانیوں پر کسی بھی نئی ویزا پابندی سے دفتر خارجہ آگاہ نہیں ہے۔ پاکستانیوں کی ایک بڑی تعداد سعودی عرب میں مقیم ہے اور پاکستان اس معاملے پر مسلسل رابطے میں ہے۔