شہباز کی نیندیں حرام کرینگے، عمران خان کا قومی اسمبلی میں واپسی کا عندیہ

لاہور:تحریک انصاف کے چیئرمین عمران خان نے قومی اسمبلی میں واپسی کا عندیہ دے دیا۔لاہور میں صحافیوں سےگفتگوکرتے ہوئے عمران خان کا کہنا تھا کہ ہم شہباز شریف کی نیندیں حرام کرنے والے ہیں۔نگران سیٹ اپ کے لیے قومی اسمبلی میں واپس جاسکتے ہیں۔ہم اسمبلی میں نہ گئے تو یہ راجہ ریاض سے مل کر نگران سیٹ اپ بنالیں گے۔

سابق وزیر اعظم عمران خان نے کہا کہ ہم نے قومی اسمبلی کے حوالے سے پلان کرلیا ہے، مسلم لیگ ن کے ایم این اے رابطے میں ہیں۔پہلے ان کا ٹیسٹ کریں گے پھر اپنی پارٹی میں شامل کریں گے۔یہ بری طرح پھنس گئے ہیں، باجوہ ڈاکٹرائن میں کوئی زیادہ کمی نہیں آئی، پنجاب میں نگران وزیراعلی کے لیے وہ نام دیے جو ن لیگ کو قابل قبول ہوں، مجھے یقین ہے کہ مارچ اپریل میں الیکشن ہو جائیں گے۔رن آف الیکشن ہوا تو موقعےکے مطابق فیصلہ کریں گے۔

عمران خان کا کہنا تھا کہ رات اسحاق ڈار نے پیٹرول بڑھانا تھا لیکن نہیں بڑھایا، اس کا مطلب ہے کہ اب آئی ایم ایف نہیں آئےگا، انہیں 2 ارب ڈالرکا قرضہ ملا اور 2 ارب ڈالر ترسیلات زر میں کمی بھی آگئی۔

کراچی میں بلدیاتی الیکشن کے حوالے سے عمران خان کا کہنا تھا کہ پیپلزپارٹی دھاندلی کے بغیر نہیں جیت سکتی، تحریک انصاف کی کراچی میں شکست کی وجہ تنظیم کی کمزوری اور پیپلزپارٹی کی دھاندلی ہے۔ مسلم لیگ ق کے پی ٹی آئی میں انضمام کے سوال پر سابق وزیراعظم نےکہا کہ ق لیگ کا مستقبل تحریک انصاف کے ساتھ ہے، ق لیگ بلے کے نشان پر لڑے گی تو ان کی جیت ہوگی۔