جنگ کسی کے مفاد میں نہیں، تنازعات کو بات جیت سے حل کیا جانا چاہیے، عمران خان

ماسکو : وزیراعظم عمران خان کی دورہ روس کے دوران روسی صدر ولادی میر پیوٹن سے اہم ملاقات ہوئی جس میں دوطرفہ تعلقات، علاقائی اور بین الاقوامی امور ،توانائی کے منصوبوں میں تعاون پرتبادلہ خیال کیا گیا۔

وزیراعظم آفس کی جانب سے جاری اعلامیے کے مطابق وزیراعظم نے کہا کہ دوطرفہ تعلقات کومستقبل میں مزید وسعت دی جائے گی ، افغانستان میں ممکنہ اقتصادی بحران کو روکنے کی ضرورت ہے ، پاکستان ایک مستحکم، پرامن افغانستان کے لیے عالمی برادری کے ساتھ مل کر کام کرتا رہے گا۔ وزیراعظم نےشنگھائی تعاون تنظیم سمیت مختلف فورمز پر پاک روس تعاون اور ہم آہنگی پر بھی زور دیا۔ وزیراعظم نے روسی صدر کو مقبوضہ کشمیر میں انسانی حقوق کی سنگین صورتحال سے بھی آگاہ کیا۔علاقائی امن کے لیے خطے میں توازن انتہائی اہم ہے۔ وزیراعظم نے پاکستان اور روس کے مابین پاکستان اسٹریم گیس پائپ لائن منصوبے کے حوالے سے بھی تبادلہ خیال کیا۔

Prime Minister @ImranKhanPTI arrived at Kremlin earlier today to meet Russian President Vladimir Putin.#PMIKinRussia pic.twitter.com/yQq8tgae6H

— Prime Minister's Office, Pakistan (@PakPMO) February 24, 2022

وزیراعظم نے روس اور یوکرین کے درمیان تازہ ترین صورتحال پر افسوس کا اظہار کرتے ہوئے کہاکہ جنگ کسی کے مفاد میں نہیں ،پاکستان کو یقین ہے کہ سفارت کاری سے دونو ں ملکوں کے فوجی تنازعے کو ختم کیا جاسکتا ہے۔ تنازعات کی صورت میں ترقی پذیر ممالک معاشی طور پرزیادہ متاثر ہوتے ہیں۔وزیراعظم عمران خان نے دنیا میں انتہا پسندی اور اسلامو فوبیا کے بڑھتے رجحانات پر تشویش کا اظہار کرتے ہوئے بین المذاہب ہم آہنگی کی ضرورت پر زور دیا۔۔