پاکستانی سفارتخانہ نے افغان شہریوں کیلئے ویزہ اجرا محدود کردیا

کابل: افغانستان میں پاکستانی سفارتخانے کی جانب سے افغانی نوسر بازوں کے خلاف ٹھوس کارروائی تک افغان شہریوں کے لئے ویزے کا اجرا محدود کردیا ہے۔

کابل میں پاکستانی سفارت خانے کے ترجمان کی جانب سے جاری ایک بیان میں کہا گیا ہے کہ افغان شہریوں کے لئے ویزے کا اجرا محدود کردیا ہے، جس کی وجہ افغانی نوسرباز گروہ ہے جو لوگوں سے پیسے لے کر سفارت خانے کے قونصلر سیکشن تک جانے کے لئے رسائی دیتا ہے۔

اس نوسر باز گروہ کو پولیس کی بھی تائید حاصل ہے اور متعدد شکایات کے باوجود اس گروہ کے خلاف پولیس بھی کارروائی نہیں کر رہی، نوسربازوں کے خلاف کارروائی کے بعد مکمل ویزا سروس کھول دی جائے گی۔

سفارت خانے کے ترجمان کا کہنا تھا کہ پاکستان کے لئے اب صرف بزرگ، مریض، خواتین، اور کاروباری حضرات کو ویزے جاری کئے جائیں گے، نوسر بازوں کے خلاف کارروائی کے بعد مکمل ویزا سروس بحال کر دی جائے گی۔