مودی کو اینٹ کا جواب پتھر سے دینے کیلئے پاکستانی فوج اور قوم تیار ہے، وزیراعظم

مظفر آباد: وزیراعظم عمران خان کا کہنا ہے کہ وہ کشمیر کا سفیر بن کر اس مسئلہ کو دنیا میں مزید اجاگر کریں گے۔ پاک فوج کو پتا ہے بھارت نے آزاد کشمیر میں کارروائی کا پروگرام بنایا ہوا ہے، نریندر مودی ہم تیار ہیں، جو آپ کریں گے ہم آخری حد تک جائیں گے، پاکستانی فوج  اور قوم اینٹ کا جواب پتھر سے دینے کیلئے تیار ہے۔

آزاد کشمیر قانون ساز اسمبلی کے خصوصی اجلاس سے خطاب میں وزیراعظم عمران خان نے کہا کہ پاکستان کی آزادی کے دن میں اور مشکل ترین وقت میں کشمیری بھائیوں کے ساتھ ہوں، ہماری بھارت کے ساتھ مفادات کی کشمکش نہیں، بھارت کے خلاف ہم ایک نظریے کے ساتھ کھڑے ہیں۔

وزیراعظم کا کہنا تھا کہ ملک کا نظریہ ختم ہونے سے ملک بنانا ری پبلک بن جاتا ہے، مودی نے اپنا آخری کارڈ کھیل دیا ہے یہ کارڈ مودی کو بہت بھاری پڑے گا اور جب مقبوضہ وادی سے کرفیو اٹھے گا تو جو کچھ ہوگا اس کا بڑا خوف ہے۔ جب کہ جولوگ دو قومی نظریہ کے خلاف تھے، آج کہتے ہیں قائداعظم ٹھیک کہتے تھے۔

وزیراعظم نے کہا کہ پاک فوج کو پتا ہے بھارت نے آزاد کشمیر میں کارروائی کا پروگرام بنایا ہوا ہے، نریندر مودی ہم تیار ہیں، جو آپ کریں گے ہم آخر تک جائیں گے،  پاکستانی فوج تیار ہے، قوم تیار ہے، قوم فوج کے شانہ بشانہ لڑے گی، آزادی کے لیے جنگ میں شہداء کا مرتبہ پیغمبروں کے بعد ہوتا ہے۔

عمران خان نے کہا کہ نہرو کے کشمیریوں سے کیے گئے وعدے نظر انداز کردیے گئے، مودی نے اقوام متحدہ کی قرار دادیں ایک طرف پھینک دی ہیں، مودی کے آخری کارڈ کے بعد کشمیراب آزادی کی طرف جائے گا جب کہ ہم دنیا کو بار بار پیغام دے رہے ہیں کہ اگر جنگ ہوئی تو دنیا ذمہ دار ہوگی۔

وزیراعظم نے کہا کہ ہمارے سامنے آر ایس ایس کے بڑی خوفناک آئیڈیالوجی ہے، آرایس ایس کے نظریات ہٹلر کی پالیسی سے متاثر ہیں اور اسی آئیڈیالوجی نے مہاتما گاندھی کو قتل کیا جب کہ اس سوچ کے پیچھے مسلمانوں کے خلاف نفرت ہے۔ عمران خان نے کہا کہ آر ایس ایس والے سمجھتے ہیں مسلمان 6 سو سال حکومت نہ کرتے تو یہ عظیم قوم ہوتے اور یہ سمجھتے ہیں مسلمانوں نے ان پر حکومت کی اب بدلہ لینا ہے تاہم میں نے نریندر مودی کی اصل شکل کو دنیا کے سامنے رکھا۔

قبل ازیں وزیراعظم عمران خان 14اگست کو کشمیری بھائیوں کے نام کرنے کے اعلان کو عملی جامہ پہنانے مظفر آباد پہنچے جہاں پر صدر و وزیراعظم آزاد کشمیر نے ان کا استقبال کیا، آزاد کشمیر پولیس کے چاک و چوبند دستے نے وزیراعظم کو سلامی پیش کی۔

چیئرمین سینیٹ صادق سنجرانی، اسپیکر قومی اسمبلی اسد قیصر، وزیرامور کشمیر و گلگت بلتستان علی امین گنڈا پور بھی وزیراعظم کے ہمراہ تھے۔ قانون ساز اسمبلی کے ایوان میں پہنچنے پر وزیراعظم عمران خان کا شاندار استقبال کیا گیا