دنیا ہر قیمت پر بھارت کو کشمیریوں کے قتل عام سے روکے، وزیراعظم عمران خان

اسلام آباد:وزیراعظم عمران خان کا کہنا ہے کہ بھارت کے ظالمانہ اقدامات سے مقبوضہ کشمیر میں بڑے پیمانے پر جانی نقصان کا خدشہ ہے۔دنیا کو ہرقیمت پر بھارت کو کشمیریوں کے قتل عام سے روکنا ہوگا۔

مقبوضہ کشمیر کے معاملے پر حکومت پاکستان کے عالمی رہنماؤں سے رابطوں کا سلسلہ جاری ہے، وزیراعظم عمران خان اورجرمن چانسلراینجلا مرکل کےدرمیان آج ٹیلی فونک رابطہ ہوا ہے۔ دونوں رہنماؤں نے علاقائی امن و استحکام کیلئے مل کر کام کرنے پر اتفاق کیا۔

وزیراعظم نے بھارت کی جانب سے مقبوضہ کشمیر کی خصوصی حیثیت ختم کیے جانے کے یک طرفہ اقدام، وادی میں انسانی حقوق کی پامالیوں سے جرمن چانسلر کو آگاہ کیا۔ ان کا کہنا تھا کہ مقبوضہ کشمیر میں بھارت کے غاصبانہ اقدامات سلامتی کونسل کی قراردادوں اور بھارت کے کشمیریوں کے ساتھ وعدوں کے منافی ہے۔

عمران خان نے کہا کہ مقبوضہ کشمیر میں مکمل لاک ڈاؤن اور بلیک آؤٹ ہے،مودی سرکار نے مواصلات کے تمام ذرائع بند کر رکھے ہیں، مسلسل کرفیو کے باعث خوراک اور ادویات کی قلت پیدا ہو چکی ہے۔ بھارت کے ظالمانہ اقدامات سے کشمیر میں بڑے پیمانے پر جانی نقصان ہو سکتا ہے۔ بھارت کو ہرقیمت پر کشمیریوں کے قتل عام سے روکنا ہوگا۔

وزیراعظم عمران خان نے بھارت کی جانب سے جعلی آپریشنز کرنے کی اطلاعات پر تشویش کا اظہار کرتے ہوئے کہا ہے کہ بھارت لائن آف کنٹرول پر غیرقانونی کارروائی کر کے دنیا کی توجہ کشمیر میں جاری مظالم سے ہٹانا چاہتا ہے۔ بھارت کے اقدامات سے خطے میں امن و سلامتی کو شدید  خطرات ہیں، دنیا بھارت کو روکنے کے لئے ہنگامی اقدامات کرے۔

جرمن چانسلر اینجلا مرکل نے کہا کہ مقبوضہ کشمیر کی صورتحال کا باریک بینی سے جائزہ لے رہے ہیں، پاکستان اور بھارت کشیدگی کم کرنے کے لئے اقدامات اور دوطرفہ مسائل کا حل نکالا جائے۔