برطانوی پارلیمنٹیرنزکا کشمیریوں کے حق میں 30 اگست کو ریلی نکالنے کا اعلان

 اسلام آباد: صدر آزاد جموں و کشمیر مسعود خان اور برطانوی ارکان پارلیمنٹ نے جمعہ 30 اگست کو برطانیہ کے ہائیڈ پارک سے بھارتی ہائی کمیشن تک کشمیریوں کے حق میں ریلی نکالنے کا اعلان کیا ہے۔

صدر آزاد کشمیر سردار مسعود خان سے برطانوی ارکان پارلیمنٹ کے وفد نے اسلام آباد میں ملاقات کی، وفد میں خالد محمود، عمران حسین اور سٹیفن ٹمز شامل تھے۔  ملاقات میں مودی سرکار کے عالمی قوانین کو خاطر میں نہ لاتے ہوئے کشمیر کی خصوصی حیثیت کے خاتمے کے بعد مقبوضہ وادی میں پیدا صورتحال پر تشویش کا اظہار کیا۔ برطانوی پارلیمنٹیرینز نے کشمیریوں پر بھارتی مظالم اور انسانی حقوق کی سنگین خلاف ورزیوں کی بھرپور مذمت کی گئی۔

صدر آزاد کشمیر مسعود خان اور برطانوی پارلیمانی وفد نے مشترکہ نیوز کانفرنس کرتے ہوئے کہا کہ بھارتی فوج مقبوضہ وادی میں نسل کشی کر رہی ہے، پانچ اگست کے اقدام کے بعد سے دنیانے بھارت کے جھوٹے بیانیے کو مسترد کر دیا ہے جب کہ خود ہندوستان کے اندر سول سوسائٹی اور معتدل صحافیوں نے مودی سرکار کے جارحانہ بیانیے کی مخالفت اور معصوم کشمیریوں کے حقوق کی بات کی ہے۔

اس موقع پر صدر آزاد کشمیر نے بھارتی مظالم کیخلاف لندن میں احتجاجی ریلی نکالنے کا اعلان کرتے ہوئے کہا کہ جمعہ کو ہائیڈ پارک برطانیہ سے بھارتی ہائی کمیشن تک ریلی نکالی جائے گی جس میں برطانوی ارکان پارلیمنٹ سمیت کشمیریوں اور مختلف شعبہ ہائے زندگی سے تعلق رکھنے والے ہزاروں افراد شرکت کریں گے اور بھارتی مظالم کے خلاف صدائے احتجاج بلند کریں گے۔

اس موقع پر برطانوی پارلیمنٹ کے رکن عمران حسین نے اعلان کیا کہ وہ آئندہ 2 روز تک لائن آف کنٹرول کا دورہ کریں گے، عالمی برادری کو مسئلہ کشمیر پر مزید سنجیدگی دکھانے کی ضرورت ہے اور بالخصوص سلامتی کونسل کو متفقہ مذمتی قرارداد لانی چاہیے تھی۔

برطانوی پارلیمنٹیرینز نے کہا کہ وہ صدر پاکستان سے ملے ہیں اور وزیراعظم پاکستان سے بھی ملاقات کریں گے۔ بھارتی اقدامات پر پوری دنیا کو تشویش ہے، مقبوضہ کشمیر میں اب تک 4 ہزار سے زائد افراد کو گرفتار کیا جاچکا ہے، مقبوضہ وادی میں بھارتی مظالم اور انسانی حقوق کی سنگین خلاف ورزیوں کا سلسلہ جاری ہے جو ہر گزرتے دن کے ساتھ بڑھ رہے ہیں۔