کرتارپور راہداری کی تکمیل۔۔کنفیوژ مودی سرکار نے سکھوں کیلئے پاکستانی مراعات ٹھکرا دیں

اسلام آباد: پاکستان کی جانب سے سکھ برادری کے لئے انمول تحفے کرتار پور راہداری کی تکمیل کے بعد مودی سرکار ذہنی الجھاؤ کا شکار نظر آ رہی ہے، بھارت نے پاکستان کی طرف سے بابا گرونانک کے 550 ویں جنم دن کے موقع پر سکھوں کے لیے دی گئیں مراعات کو مسترد کر دیا۔

دفتر خارجہ کی  جانب سے جاری بیان میں کہا گیا ہے کہ سکھ برادری کے روحانی پیشوا بابا گرونانک کی 550 ویں برسی کے موقع پر سکھ یاتریوں کے لیے خصوصی مراعات کا اعلان کیا گیا تھا اور وزیراعظم عمران خان نے 10 دن پہلے فہرستوں کی فراہمی اور پاسپورٹ کی شرط کے خاتمے کا اعلان کیا تھا تاہم بھارت نے پاکستان کی طرف سے سکھوں کے لیے دی گئیں مراعات کو مسترد کر دیا گیا ۔

دفتر خارجہ کے مطابق پاکستان کا کہنا ہے کہ بھارت قیادت کرتارپور راہداری پر ذہنی الجھاو کا شکار ہے، بھارت نے وزیراعظم کی اعلان کردہ مراعات کو مسترد کر کے سکھوں کے جذبات کو مجروح کیا، اگر بھارت مراعات سے فائدہ نہیں اٹھانا چاہتا تو یہ اس کی مرضی ہے۔