بجلی تقسیم کار کمپنیوں کی صارفین پر17 ارب 20 کروڑ روپے کا بوجھ ڈالنے کی تیاری

اسلام آباد: نیپرا نے تقسیم کار کمپنیوں کی جانب سے بقایا جات کی مد میں بجلی مہنگی کر کے 17 ارب 20 کروڑ روپے کا بوجھ عوام پر ڈالنے کی درخواست پر فیصلہ محفوظ کر لیا۔

نیشنل الیکٹرک پاور ریگولیٹری اتھارٹی (نیپرا) کے چیئرمین نے بجلی کی تقسیم کار کمپنیوں کی جانب سے بقایا جات کی مد میں ٹیرف بڑھانے سے متعلق درخواست پر سماعت کی۔ جس میں جولائی تا ستمبر 2019 کے بقایا جات کی مد میں بجلی کی قیمت میں 17 پیسے فی یونٹ اضافے کی استدعا کی گئی ہے۔

درخواست میں آئیسکو کی جانب سے 1 ارب 44 کروڑ اور لیسکو کی جانب سے 5 ارب روپے وصولی کی درخواست کی گئی ہے۔گیپکو نے 1 ارب 53 کروڑ، فیسکو نے 94 کروڑ روپے سے زائد کی وصولی کی اجازت مانگی ہے، جب کہ میپکو 2 ارب 21 کروڑ اور پیسکو 3 ارب 66 کروڑ روپے کے بقایا جات وصول کرنا چاہتا ہے۔

 حیسکو نے 2 ارب 50 کروڑ، کیسکو 1 ارب 52 کروڑ، سیپکو نے 1 ارب 19کروڑ وصولی کی درخواست کی ہے۔تقسیم کمپنیوں کے بقایاجات وصولی کی مد میں 17 پیسے فی یونٹ اضافے کی درخواست پر سماعت کے بعد فیصلہ محفوظ کر لیا گیا جو مناسب وقت پر سنایا جائے گا۔