پاکستان کے خلاف دوسرےٹیسٹ میچ میں سری لنکا کی ٹیم 271 رنز بنا کر آؤٹ

کراچی: دوسرے ٹیسٹ کے دوسرے دن پاکستان کے 191 رنز کے جواب میں سری لنکا کی ٹیم 271 رنز بناکر آؤٹ ہوگئی ہے۔

نیشنل کرکٹ اسٹیڈیم کراچی میں پاکستان اور سری لنکا کے درمیان دوسرا ٹیسٹ میچ کھیلا جارہا ہے، قومی ٹیم نے پہلے دن ٹاس جیت کر پہلے بیٹنگ کی اور 191 رنز بناکر آؤٹ ہوگئی تھی جب کہ سری لنکا نے 3 کھلاڑیوں کے نقصان پر 64 رنز بنائے تھے۔

ٹیسٹ میچ کے دوسرے دن سری لنکا نے قومی ٹیم کے 191 رنز کے جواب میں 271 رنز بنائے اور اس کے تمام کھلاڑی آؤٹ ہو گئے۔ جس کے بعد آئی لینڈرز کو پاکستان پر 80 رنز کی برتری حاصل ہوگئی ہے۔ پاکستان کی جانب سے شاہین شاہ آفریدی نے 5 اورمحمد عباس نے 4 وکٹیں حاصل کیں، 19 سالہ شاہین شاہ آفریدی نے پہلی بار ٹیسٹ اننگز میں 5 وکٹیں لیں۔

خیال رہے کہ پاکستان اور سری لنکا کے درمیان پہلا ٹیسٹ میچ راولپنڈی میں کھیلا گیا تھا جو بارش اور خراب موسم کے باعث ڈرا ہوگیا تھا۔