نیب کو تاجروں کے معاملات سے الگ کردیا، 2020 ترقی کا سال ہو گا، وزیراعظم

کراچی:وزیراعظم عمران خان کا کہنا تھا کہ کاروباری طبقے کے دل میں قومی احتساب بیورو کا بہت زیادہ خوف تھا لیکن آج ہم نے ایک آرڈیننس کے ذریعے نیب کو تاجروں کے معاملات سے الگ کردیا ہے، 2019 معاشی استحکام کا سال تھا اور 2020 ترقی کا سال ہوگا۔

اپنے ایک روزہ دورہ کراچی کے دوران پاکستان اسٹاک ایکسچینج میں منعقدہ تقریب سے خطاب کرتے ہوئے وزیراعظم عمران خان نے کہا کہ پاکستان کو ترقی میں سب سے آگے لے جانا چاہتے ہیں، مشکل وقت گزرنے کے بعد ملک میں معاشی استحکام آگیا ہے۔

ان کا کہنا تھا کہ پاکستان جس مقصد کے لیے بنا تھا اگر ہم اپنے تمام کام اس مقصد کو مدنظر رکھتے ہوئے کریں تو ہمیں کامیابی حاصل ہوگی اور معاشی ترقی کے بغیر کسی بھی ملک کی کامیابی ممکن نہیں ہے جب کہ ریاست اپنے کمزور طبقے کی ذمہ داری لیتی ہے اور ایسے ہی ملک سے غربت کا خاتمہ ممکن ہے۔

وزیراعظم نے کہا کہ بزنس کمیونٹی کے دل میں قومی احتساب بیورو (نیب) کا بہت زیادہ خوف تھا لیکن آج ہم نے ایک آرڈیننس کے ذریعے نیب کو تاجروں کے معاملات سے الگ کردیا۔ ہم تاجر برادری کے لئے مزید آسانیاں پیدا کرنا چاہتے ہیں کیوں کہ ہماری پوری کوشش ہے کہ ملک میں زیادہ سے زیادہ سرمایہ کاری ہو۔

عمران خان نے کہا کہ  لوگ بار بار کہتے ہیں کہ پچھلوں کی بات نہ کریں بلکہ اپنی بات کریں کہ آپ نے کیا کیا لیکن انہیں کہنا چاہتا ہوں کہ ہمیں سوئیڈن کی معیشت نہیں ملی تھی، ہم اپنی کارکردگی بھی دکھاتے رہیں گے اور 2023 تک آپ لوگوں کو بھولنے نہیں دوں گا کہ ہمیں کیسا پاکستان ملا تھا تاکہ لوگ موازنہ کرسکیں۔

وزیراعظم عمران خان کا کہنا تھا کہ مشکل وقت سے گزرنے کے بعد ملک میں استحکام آگیا ہے، 2019 معاشی استحکام کا سال تھا اور 2020 ترقی کا سال ہوگا، ملک میں روزگار کے مواقع پیدا کریں گے اور سیاحت کے شعبے میں بہتری لاکر نوجوانوں کے لیے نوکریوں کے مواقع پیدا کریں گے۔