سی پیک کےمعاملے پرجو پاکستان کے مفاد میں ہے اس پرعمل پیرارہیں گے،شاہ محمود قریشی

اسلام آباد: وزیرخارجہ شاہ محمود قریشی کا کہنا ہے کہ پاک چین اقتصادی راہداری کے معاملے پر پاکستان نے اپنے مفاد کو دیکھنا ہے، جو چیز ہمارے مفاد میں ہے ہم اس پر عمل پیرا رہیں گے۔

وزیرخارجہ مخدوم شاہ محمود قریشی کی جانب سے جاری بیان میں کہا ہے کہ پاکستان کی بھرپور کوشش ہے کہ اپنا نکتہ نظر دنیا کے سامنے رکھے،اگر کشمیر میں حالات بگڑتے ہیں یا جنوبی ایشیا میں کوئی چپقلش جنم لیتی ہے تو اس کے خطے کی معیشت پر منفی اثرات مرتب ہوںگے۔

ان کا کہنا ہے کہ کشمیر سمیت دیگر علاقائی مسائل اجاگر کرنا ہمارے فرائض میں شامل ہے، وزیراعظم عمران خان نے مسئلہ کشمیر سمیت تمام مسائل کو اجاگر کیا ہے،  شاہ محمود قریشی نے کہا ہے کہ صدر ٹرمپ نے دورہ پاکستان پر آمادگی کا اظہار کیا ہے اور وہ جلد پاکستان آنے کے خواہش مند ہیں۔ امریکی پاکستان کی اہمیت کو سمجھتے ہیں اس لئے وہ پاک امریکا دوطرفہ تعلقات کو بڑھانا چاہتے ہیں۔

امریکی نائب سیکریٹری برائے جنوبی و وسطی ایشیا ایلس ویلز کے سی پیک سے متعلق بیان کی طرف اشارہ کرتے ہوئے شاہ محمود قریشی نے کہا کہ پاک چین اقتصادی راہداری کے حوالے سے ہمیں اپنے مفاد کو دیکھنا ہے، جو چیز ہمارے مفاد میں ہے ہم اس پر عمل پیرا رہیں گے۔