تشویشناک خبر۔۔ چین زیر تعلیم 4 پاکستانی طلبہ میں جان لیونا کرونا وائرس کی تصدیق

اسلام آباد: وزیراعظم کے معاون خصوصی برائے صحت ڈاکٹرظفر مرزا نے چین کے شہر ووہان میں موجود 4 پاکستانی طلبہ کے کورونا وائرس سے متاثر ہونے کی تصدیق کردی۔

معاون خصوصی برائے صحب نے اسلام آباد میں کرونا وائرس پر بریفنگ دیتے ہوئے بتایا کہ چین میں 28 سے 30 ہزار پاکستانی موجود ہیں جن میں سے کرونا وائرس سے سب سے زیادہ متاثرہ ووہان شہر میں 500 پاکستانی طلبہ زیر تعلیم ہیں، جن میں سے 4 پاکستانی طلبہ میں کرونا وائرس کی تصدیق ہوئی ہے تاہم علاج کے بعد ان کی صحت میں بہتری آئی ہے۔

ڈاکٹر ظفرمرزا نے بتایا کہ چین میں پاکستانی سفارت خانہ اپنے شہریوں اور بالخصوص طلبہ سے رابطے میں ہے، اطمینان بخش بات یہ ہے کہ پاکستان میں کرونا وائرس کا کوئی مریض نہیں اور ملک اس وائرس سے محفوظ ہے، تاہم اس مرض کے شبہ میں چار مریضوں کو مختلف اسپتالوں میں لایا گیا جنہیں سخت زیرنگرانی رکھا گیا ہے۔

معاون خصوصی برائے صحت کا کہنا تھا کہ کرونا وائرس کی مخصوص علامات نہیں جس کے باعث اس کی تشخیص مشکل ہے، اس بیماری میں سر درد، بخار، کھانسی اور سانس میں تکلیف کی شکایت ہوتی ہے، لیبارٹری میں جانچ پڑتال کے بغیر اس وائرس کی تشخیص نہیں کی جا سکتی، اس سے چھاتی کا انفیکشن ہوتاہے جو نمونیا کی شکل اختیار کر لیتاہے، تحقیق کے مطابق کرونا وائرس کے صرف 3 فیصدمریضوں کی اموات ہوتی ہیں۔

ڈاکٹر ظفرمرزا کا کہنا تھا کہ چین نے کرونا وائرس سے بچاوَ کےلیے زبردست اقدامات کیے ہیں اور ووہان کےلیےآمدورفت بند کردی گئی ہے،دنیا بھر میں 6 ہزار 52 افراد میں کروناوائرس کی تشخیص ہوچکی ہے جن میں سے 99فیصد مریض چین میں ہیں، چین کے علاوہ 14 ممالک میں کرونا وائرس کے مریض سامنے آئے ہیں،چین کےعلاوہ دیگر ممالک میں کروناوائر س سے اموات نہیں ہوئیں، بیماری میں شدت ہے لیکن مرنے والوں کی شرح بہت کم ہے۔

خیال رہے کہ چین میں خطرناک کرونا وائرس سے ہلاک افراد کی تعداد 132 ہوگئی ہے اور ہزاروں افراد متاثر ہیں۔