شہباز شریف نے جھوٹی خبر پر برطانوی اخبار ڈیلی میل کیخلاف مقدمہ دائر کر دیا

لندن: پاکستان مسلم لیگ (ن) کے صدر شہباز شریف نے جھوٹی خبر شائع کرنے پر برطانوی اخبار ڈیلی میل اور صحافی ڈیوڈ روز کے خلاف برطانوی عدالت میں مقدمہ دائر کردیا ہے۔

قائد حزب اختلاف شہباز شریف نے جھوٹی خبرشائع کرنے پر برطانوی اخبار ڈیلی میل اور صحافی ڈیوڈ روز کے خلاف لندن کی ہائی کورٹ میں مقدمہ دائر کیا جس کے بعد عدالت کی جانب سے ڈیلی میل اخبار اور صحافی ڈیوڈ روز کو نوٹس بھی جاری کردیے گئے ہیں۔

لندن میں پریس کانفرنس کے دوران شہباز شریف نے کہا کہ من گھڑت خبر عمران خان نیازی کی ہدایت پر چھاپی گئی، نیب اور نیازی کا گٹھ جوڑ نہ ہوتا تو میرے خلاف آشیانہ کیس نہ ہوتا، چیف جسٹس نے عدالت میں کہا کہ نیب بتائے شہبازشریف نے کہاں کرپشن کی ہے۔

صدر مسلم لیگ (ن) کا کہنا تھا کہ قومی احتساب بیورو کا آج تک مجھے رسمی نوٹس نہیں ملا، نواز شریف کی زیر قیادت پاکستان میں کئی ترقیاتی منصوبوں میں سینکڑوں ارب روپے کی بچت کی تاہم عمران خان کے حواریوں نے جو کچھ کیا اس کا لندن ہائی کورٹ میں انصاف ہوگا۔

قومی اسمبلی میں قائد حزب اختلاف میاں شہباز شریف کی جانب سے دعویٰ 14 جولائی کو ان کے خلاف شائع ہونے والے آرٹیکل پر دائر کیا گیا ہے، آرٹیکل میں شہباز شریف پر برطانوی عوام کے ٹیکس کے پیسے کی خرد برد کا الزام لگایا گیا تھا۔