نمازجمعہ کےاجتماعات مختصر، بزرگ و بچے مساجد میں نہ جائیں، اسلامی نظریاتی کونسل

اسلام آباد: اسلامی نظریاتی کونسل نے کہا ہے کہ ملک میں کورونا وائرس کی روک تھام کیلئے علمائے کرام نماز جمعہ کے اجتماعات کو مختصر کریں جب کہ بزرگ و بچے مساجد میں نہ جائیں۔

وفاقی وزیر مذہبی امور پیر نورالحق قادی نے نماز جمعہ اور دیگر مذہبی اجتماعات سے متعلق علمائے کرام سے مشاورت کی ، جس پر علماء نے اپنی سفارشات وفاقی وزیر کو دے دی ہیں۔چیئرمین اسلامی نظریاتی کونسل ڈاکٹر قبلہ ایاز کا کہنا ہے کہ کونسل نے مذہبی اجتماعات سے متعلق سفارشات تیار کر لی ہیں۔

ڈاکٹر قبلہ ایاز کےمطابق سفارشات میں کہا گیا ہے کہ ملک میں جاری مذہبی اجتماعات ملتوی کیے جائیں، فی الحال مساجد بند کرنے یا نماز جمعہ کی ادائیگی پابندی کی کوئی صورتحال نہیں،  تاہم نماز جمعہ کے اجتماع میں بیانات کے بجائے مختصر خطبہ دیا جائے، جمعہ کے اجتماعات مختصر ہوں، بچے اور بزرگ افراد مسجد نہ جائیں۔

انہوں نے مزید کہا ہے کہ اسلامی نظریاتی کونسل کی سفارشات منگل کو وفاقی کابینہ اجلاس میں پیش کی جائیں گی، نماز جمعہ کے اجتماعات پر حتمی فیصلہ حکومت نے کرنا ہے، لیکن صورت حال خراب ہونے پر نماز جمعہ کے اجتماع پر پابندی عائد ہوئی تو اس پر عمل کرنا ضروری ہے۔