اسلام آباد ہائی کورٹ نے آن لائن گیم پب جی پر پابندی ختم کر دی، فوری بحالی کا حکم

اسلام آباد: آن لائن گیم پب جی کھیلنے والوں کے لیے خوش خبری ہے کہ اسلام آباد ہائی کورٹ نے آن لائن گیم پر عائد پابندی ختم کرتے ہوئے اسے فوری طور پر کھولنے کا حکم دے دیا۔

اسلام آباد ہائی کورٹ کے جسٹس عامرفاروق نے پب جی پر پابندی کے خلاف محفوظ فیصلہ سناتے ہوئے پب جی پر پابندی کا فیصلہ کالعدم قرار دے دی اور حکم دیا کہ پاکستان ٹیلی کمیونی کیشن اتھارٹی (پی ٹی اے) پب جی گیم کو فوری طور پر کھول دے۔

عدالت عالیہ نے آن لائن گیم سے متعلق پی ٹی اے کو سات روز میں دوبارہ فیصلہ کرنے کا حکم دیا جب کہ پب جی کیخلاف شکایات کی تفصیلات اور اس پر پابندی کی وجوہات بھی طلب کر لیں۔

پاکستان ٹیلی کمیونی کیشن اتھارٹی (پی ٹی اے) پرتشدد گیم کھیلنے والے نوجوانوں میں خودکشی کے رجحان اور شہریوں کی شکایات کے بعد پب جی پر پابندی لگائی تھی، پاکستان میں پب جی کنٹرول کرنے والی کمپنی نے پی ٹی اے فیصلے کو چیلنج کیا تھا

واضح رہے کہ پی ٹی اے نے فیصلہ کیا ہے کہ آن لائن گیم پب جی پر پابندی برقرار رہے گی۔ اتھارٹی نے یہ فیصلہ لاہور ہائیکورٹ کی ہدایت کی روشنی میں 9 جولائی کو کی گئی تفصیلی سماعت کے بعد کیا ہے۔ سماعت میں دلچسپی کی حامل دیگر پارٹیوں نے بھی شرکت کی۔

 پی ٹی اے نے پب جی کی انتظامیہ سے پب جی کے سیشنز، پاکستان میں استعمال کنندگان کی تعداد اورکمپنی کی طرف سے نافذ کردہ کنٹرولز کی تفصیلات طلب کی تھیں تاہم پب جی کی طرف سے جواب موصول نہیں ہوا۔