عالمی برادری معصوم کشمیریوں کیخلاف جرائم پر بھارت کا احتساب کرے، پاکستان

اسلام آباد: پاکستان نے ایک بار پھر عالمی برادری سے کشمیریوں کے خلاف جرائم پر بھارت کا احتساب کرنے کا مطالبہ کیا ہے۔

دفترخارجہ کے ترجمان زاہد حفیظ چودھری نے اسلام آباد میں ہفتہ وار میڈیا بریفنگ کے دوران کہا کہ وزیرخارجہ شاہ محمود قریشی نے اقوام متحدہ کی سلامتی کونسل کے صدر کو نیا خط لکھا ہے جو عالمی ادارے کو غیر قانونی طور پر بھارت کے زیر قبضہ جموں وکشمیر میں انسانی حقوق کی سنگین خلاف ورزیوں سے آگاہ کرنے کی کوششوں کا حصہ ہے۔

زاہد حفیظ چوہدری کا کہنا تھا کہ وزیرخارجہ نے اپنے خط میں مقبوضہ کشمیر میں انسانی حقوق کی منظم اور سنگین خلاف ورزیوں، مقبوضہ علاقے میں آبادی کا تناسب تبدیل کرنے کیلئے بھارت کے غیر قانونی اقدامات، بھارت کے جنگی جنون، اشتعال انگیزیاں اور جارحانہ اقدامات سے امن وسلامتی کو درپیش خطرات کو اجاگر کیا ہے۔

ترجمان دفتر خارجہ نے اپنی بات جاری رکھتے ہوئے کہا کہ مودی سرکار کی جانب سے ایمنسٹی انٹرنیشنل کے خلاف حالیہ کارروائی اس کے انتہا پسند ایجنڈے کی ایک اور عکاسی ہے جو انسانی حقوق کی خود مختار تنظیموں سے سچ سننے کیلئے تیار نہیں ہے۔

زاہد حفیظ چوہدری نے کہا کہ بی جے پی حکومت کی کارروائی نے ایک بار پھر دنیا کے سامنے بھارت کا مکروہ چہرہ بے نقاب کر دیا ہے، سب سے بڑی نام نہاد جمہوریت کی حقیقت عالمی برادری پر عیاں ہو گئی ہے۔ ترجمان نے بھارت کی نام نہاد ہمسائیگی کی پہلی پالیسی کے حوالے سے ایک سوال کے جواب میں کہا کہ ایسی کوئی پالیسی موجود نہیں اور یہ صرف ایک دکھاوا ہے۔

ان کا مزید کہنا تھا کہ موجودہ بھارتی قیادت کو دراصل ہندوتوا نظریے سے رہنمائی حاصل ہے جو بھارتیہ جنتا پارٹی اور راشٹریہ سوائم سیوک سنگھ دونوں کے نظریات کا امتزاج ہے۔ وقت کا تقاضا ہے کہ وزیراعظم مودی اور ان کے ساتھیوں کو سنجیدگی سے صورتحال کا مشاہدہ کرنا ہوگا۔

پاکستان میں قید بھارتی جاسوس کمانڈر کلبھوشن یادیو کی اس کے والد اور اہلیہ سے ملاقات کا اہتمام کرنے کی پیشکش کے بارے میں ایک سوال کے جواب میں انہوں نے کہا کہ پاکستانی پیشکش اب بھی برقرار ہے تاہم بدقسمتی سے بھارتی حکام کی جانب سے کوئی درعمل نہیں ملا۔