کورونا کیسز میں اضافہ کراچی، اسلام آباد، آزادکشمیر میں پھر سمارٹ لاک ڈاؤن نافذ

اسلام آباد: ملک کے مختلف حصوں میں کورونا وائرس نے پھر سے پنجے گاڑھ لئے ہیں، کراچی، اسلام آباد اور آزاد کشمیر میں وباء کی صورتحال تشویشناک ہونے پر دوبارہ سمارٹ لاک ڈاؤن نافذ کر دیا گیا۔

وفاقی وزیر برائے منصوبہ بندی و ترقی اسد عمر نے سماجی رابطے کی ویب سائٹ پر جاری بیان میں کہا ہے کہ کورونا کیسز کی 6 ہفتے اوسط قومی سطح پر پوزیٹیویٹی دو فیصد سے کم رہنے کے بعد پچھلے ہفتے دو فیصد سے زیادہ رہی ہے۔ کراچی، اسلام آباد، آزاد کشمیر میں منی اسمارٹ لاک ڈاؤن دوبارہ نافذ کردیا گیا ہے۔

اپنی بات جاری رکھتے اسد عمر نے بیان میں مزید لکھا ہے کہ ملک بھر میں کورونا وائرس کے بڑھتے کیسز اور خراب ہوتی صورتحال کو قابو میں لانے کیلئے انتظامیہ کو حفاظتی اقدامات یقینی بنانے کی ہدایت کی گئی ہے لیکن کامیابی پہلے کی طرح عوام کے تعاون کے بغیر ناممکن ہے۔

دوسری جانب اسلام آباد میں کورونا کے ہاٹ اسپاٹ علاقوں آئی ایٹ 2، جی نائن 4 اور جی ٹین کی 10 گلیاں سیل کردی گئیں ہیں، ڈسٹرکٹ ہیلتھ افسر کی سفارش پر شہر کے 3 سب سیکٹرز کی مختلف گلیاں سیل کی گئیں جب کہ ڈپٹی کمشنر اسلام آباد نے گلیوں کو سیل کرنے کی تصاویر بھی شیئر کردی ہیں۔