مہنگائی پر وزراء کی ایک دوسرے پر تنقید، وزیراعظم کی ہنگامی اقدامات کی یقین دہانی

اسلام آباد: وفاقی کابینہ کے اجلاس میں وفاقی وزراء نے مہنگائی کے معاملے پر ایک دوسرے پر تنقید کی اور ہنگامی اقدامات کا مطالبہ کیا ہے، وزیراعظم نے مہنگائی میں کمی کیلئے ہنگامی بنیادوں پر اقدامات کی یقین دہانی کرائی اور کہا کہ تمام تر صورتحال کو خود مانیٹر کررہا ہوں، دیکھتے ہیں اب مافیا کیا کرتا ہے۔

وزیراعظم عمران خان کی زیرصدارت وفاقی کابینہ کا اجلاس اسلام آباد میں ہوا جس میں بجلی گیس اور ادویات کی بڑھتی قیمتوں پر بات چی کی گئی، وزراء نے بڑھتی مہنگائی پر ہنگامی اقدامات کا مطالبہ کیا۔ وفاقی وزیر مراد سعید، شیخ رشید، فیصل واوڈا اور دیگر وزراء نے مہنگائی کا معاملہ اٹھایا۔ کابینہ ارکان نے کہا کہ صوبائی حکومتوں اور ضلعی انتظامیہ کو اشیاء کی دستیابی یقینی بنانا ہوگی۔

اجلاس میں ملک میں بڑھتی مہنگائی پر وفاقی وزراء نے ایک دوسرے کو تنقید کا نشانہ بنایا، ذرائع کا کہنا ہے کہ وفاقی وزیر مواصلات مراد سعید نے معاون خصوصی ندیم بابر اور وفاقی وزیر عمر ایوب کو آڑے ہاتھوں لیا اور کہا کہ کابینہ میں فیصلے کچھ ہوتے ہیں لیکن عوام کو ریلیف نہیں ملتا، بجلی اور گیس کی قیمتوں میں اضافہ کے ذمہ دار آپ لوگ ہیں۔

معاون خصوصی برائے صحت ڈاکٹر فیصل سلطان کی جانب سے ادویات کے حوالے پر بریفنگ کے موقع پر شیخ رشید کا کہنا تھا کہ ادویات مہنگی ہونے کی وجہ سے لوگوں کی باتیں سننا پڑتی ہیں۔ وزیراعظم کی کابینہ ارکان کو مہنگائی میں کمی کیلئے ہنگامی اقدامات کی یقین دہانی کروائی۔ وفاقی وزیر فیصل واوڈا نے وزیر اطلاعات کو اپنی میڈیا کی مضبوط ٹیم بنانے کا مشورہ دیا۔

وزیراعظم نے مہنگائی میں کمی کیلئے ہنگامی بنیادوں پر اقدامات کی یقین دہانی کرائی اور کہا کہ مشاورت جاری ہے، حکومت جلد ایکشن پلان پرعملدرآمد شروع کرے گی، عام آدمی کو ریلیف دینے کے لیے تمام سرکاری مشینری کو متحرک کریں گے، آنے والے دنوں میں ہماری اب پوری توجہ مہنگائی پر قابو پانے پر ہوگی۔

وزیراعظم نے کہا کہ وہ تمام تر صورتحال کو خود مانیٹر کررہے ہیں، دیکھتے ہیں اب مافیا کیا کرتا ہے؟انہوں نے این سی او سی کو کورونا کی صورتحال پر گہری نظر رکھنے کی ہدایت کرتے ہوئے کہا کہ کورونا کیسز بڑھے تو اسکولز، شادی ہالز اور دیگر اجتماعات پر پابندی لگائی جاسکتی ہے۔