حکومت کی جانب سے ایک اورمنی بجٹ لائے جانے کا امکان

اسلام آباد: پاکستان تحریک انصاف حکومت کی جانب سے ایک اور منی بجٹ لائے کا امکان ظاہر کیا جارہا ہے۔

ذرائع کے مطابق ریونیو شارٹ فال پورا کرنے اور انسداد منی لانڈرنگ و اسمگلنگ سمیت ٹیررازم فنانسنگ کی روک تھام کیلئے ایک اور منی بجٹ لائے جانے کا امکان ہے جس میں نان فائلرز کیلئے ٹیکس کی شرح میں مزید اضافہ زیرغور ہے اور منی بجٹ کے تحت ٹیکس نیٹ بڑھانے کیلئے نان فائلرز کے خلاف گھیرامزید تنگ کیا جائیگا۔

ذرائع کا کہنا ہے کہ نان رجسٹرڈ لوگوں کے لیے اشیاء کی خرید و فروخت پر ٹیکس کی شرح میں مزید 2 سے 3 فیصد اضافے کا امکان ہے، جی ایس ٹی کی شرح 17 فیصد سے بڑھا کر 18 فیصد کرنے کا بھی امکان ہے۔ وزارت خزانہ حکام کے مطابق بجٹ یا ریونیو اقدامات سے متعلق ہونے والی ورکنگ کو پالیسی بورڈ میں پیش کیا جارہا ہے، اب پالیسی سازی کا اختیار پالیسی بورڈ کے پاس جارہا ہے، اس کے علاوہ مختلف آپشنز زیر غور ہیں۔