کراچی ٹیسٹ : فواد عالم کی سنچری ،پاکستان کو جنوبی افریقہ کے خلاف 88 رنز کی برتری حاصل

نیشنل اسٹیڈیم کراچی میں جاری ٹیسٹ میچ کے دوسرے دن قومی ٹیم نے فواد عالم کی سنچری کی بدولت جنوبی افریقا کے خلاف پہلی اننگز میں 88  رنز کی برتری حاصل کرلی ہے ۔ دن کے اختتام تک قومی ٹیم نے 8 وکٹوں کے نقصان پر 308 رنز بنالیے ہیں۔

پاکستان نے 33 رنز 4 کھلاڑی آؤٹ پر آج اپنی پہلی اننگز کا دوبارہ آغاز کیا تو اظہر علی اور فواد عالم نے ذمہ داری کا مظاہرہ کرتے ہوئے قومی ٹیم کو مشکل صورتحال سے نکالا اور 94 رنز کی شراکت قائم کی تاہم اظہر علی 51 رنز بناکر آؤٹ ہوگئے۔

اظہر علی کے بعد فواد عالم کا ساتھ دینے محمد رضوان میدان میں اترے تاہم وہ بھی 33 رنز بناکر آؤٹ ہوگئے ۔فواد عالم اور فہیم اشرف نے ساتویں وکٹ پر 102 رنزکی شراکت قائم کی، اس دوران فواد عالم نے اپنے ٹیسٹ کیریئر کی تیسری سنچری مکمل کی جب کہ فہیم اشرف نے نصف سنچری بنائی ۔فواد عالم 109 رنز جبکہ فہیم اشرف 64 رنز بناکر آوٹ ہوئے ۔ دن کے اختتام پرحسن علی اور نعمان مقصود کریز پر موجود ہیں۔جنوبی افریقا نے ٹاس جیت کر پہلے بیٹنگ کرتے ہوئے 220 رنز بنائے تھے۔