سینیٹ انتخابات: پی ٹی آئی،پی پی پی، ن لیگ نے امیدواروں کی منظوری دے دی

 اسلام آباد:تحریک انصاف کے پارلیمانی بورڈ نے سینیٹ انتخابات کے لیے امیدواروں کے ناموں کی حتمی منظوری دے دی ۔عبدالحفیظ شیخ ، سیف اللہ نیازی ،ثانیہ نشتر اور بیرسٹر علی ظفر کے نام بھی فائنل کیے گئے ہیں۔ وزیراعظم عمران خان کی زیر صدارت تحریک انصاف کے پارلیمانی بورڈ کا اجلاس ہوا جس میں سینیٹ کیلئے حتمی امیدواروں کے ناموں پر غور ہوا۔مشاورت کے بعد متعدد ناموں کا اعلان کر دیا گیا۔

پارلیمانی بورڈ کے رکن وفاقی وزیر فواد چوہدری نے سوشل میڈیا پر بتایا کہ اسلام آباد سے عبدالحفیظ شیخ اور فوزیہ ارشد جبکہ ‏پنجاب سےسیف اللہ نیازی ڈاکٹر زرقا اور بیرسٹر علی ظفر کے نام فائنل کیے گئے ہیں۔پنجاب سےباقی ناموں کا اعلان بعد میں کیاجائے گا۔پارلیمانی بورڈ نے ‏خیبر پختونخواہ سے شبلی فراز، محسن عزیز، دوست محمد، ثانیہ نشتر اور فرزانہ کا نام حتمی فہرست میں شامل کیا جبکہ باقی نشستوں پر اعلان بعد میں ہو گا۔اس کے علاوہ سندھ سے فیصل واوڈا سینٹ انتخاب میں حصہ لیں گے اور سیف اللہ ابڑو ٹیکنو کریٹ سیٹ سے پی ٹی آئی کے امیدوار ہوں گے۔ بلوچستان سے عبدالقادر کے نام کی منظوری دی گئی ہے ۔

پیپلزپارٹی

پیپلزپارٹی پارلیمانی بورڈ نے بھی امیدواروں کی منظوری دیدی ہے ۔ شیری رحمان اور سلیم مانڈوی والا کے ناموں کو حتمی شکل دیدی گئی۔ کریم خواجہ اور تاج حیدر ٹیکنوکریٹ نشست پر کاغذات جمع کرائیں گے۔ خیر النسا مغل، پلوشہ خان خواتین نشستوں پر جبکہ صادق علی میمن اور جام مہتاب ڈہر جنرل نشست پر پیپلزپارٹی کے امیدوار ہونگے۔ پیپلزپارٹی نے پنجاب سے راجہ عظیم الحق کو نامزد کیا ہے۔ یوسف رضا گیلانی اسلام آباد  جبکہ فرخت اللہ بابر خیبرپختونخواہ سے پی ڈی ایم کے مشترکہ امیدوارہوں گے ۔اسلام آباد سے سابق وزیر داخلہ رحمن ملک اور اسلام الدین شیخ کو ٹکٹ نہیں مل سکا۔ دونوں رواں سال سینیٹ سے ریٹائر ہورہے ہیں۔

مسلم لیگ ن

پاکستان مسلم لیگ ن نے بھی امیدواروں کے نام فائنل کر لیے۔ مسلم لیگ ن پارلیمانی بورڈ کا اجلاس لاہور میں ہوا جس میں پرویز رشید، مشاہد اللہ خان  کو ٹکٹ دے دیا گیا۔ خواتین کی نشست پر سعدیہ عباسی کو ٹکٹ مل گیا۔ جمعیت اہلحدیث کے علامہ ساجد میر  کو جنرل سیٹ پر ٹکٹ مل گیا جبکہ اعظم نذیر تارڑ ٹیکنو کریٹ کی نشست پر الیکشن لڑیں گے۔ پارٹی کے سینئر  رہنما راجہ ظفرالحق کو ٹکٹ نہیں دیا گیا۔

جے یو آئی

جمعیت علماءاسلام نے خیبرپختونخوا سے 5 امیدواروں کے کاغذات نامزدگی جمع کرانے کا فیصلہ کیا ہے۔ جنرل نشستوں کے لیے صوبائی امیر مولاناعطاءالرحمٰن،طارق خٹک اورحاجی زبیر علی کاغذات جمع کرائیں گے۔ خواتین کی نشست کے لیے ایم پی اے نعیمہ کشور جبکہ اقلیتی نشست پر ایم پی اے سرداررنجیت سنگھ امیدوار ہونگے۔ پی ڈی ایم کا صوبائی سربراہی اجلاس 15 فروری کو ہوگا جس میں متفقہ امیدواروں کا فیصلہ بھی کیا جاسکتا ہے۔

ق لیگ، ایم کیو ایم

ادھر مسلم لیگ ق کی جانب سے کامل علی آغا نے الیکشن کمیشن میں کاغذات نامزدگی جمع کروادیے ہیں۔ایم کیو ایم کی طرف سے عامرخان، فیصل سبزواری اورعبدالقادرخانزادہ مضبوط امیدوار سمجھے جارہے ہیں۔

 دوسری  جانب سینیٹ الیکشن 2021 کے لیے الیکشن کمیشن میں امیدواروں کی جانب سے کاغذات نامزدگی ریٹرننگ افسران کے دفاتر میں جمع کرانے کا سلسلہ شروع ہوگیا۔کاغذات نامزدگی 13 فروری تک جمع کرائے جائیں گے اور نامزد امیدواروں کی ابتدائی فہرست 14 فروری کو جاری کی جائے گی۔ امیدواروں کی حتمی فہرست 23 فروری کو آویزاں کی جائے گی۔ سینیٹ انتخابات کے لیے پولنگ قومی اسمبلی اور چاروں صوبائی اسمبلیوں میں تین مارچ کو ہوگی جس کے لیے الیکشن کمیشن نے تمام انتظامات مکمل کرلیے ہیں۔