حکومت پاکستان کا بڑا فیصلہ۔۔۔ غیرملکیوں کے لئے ویزہ پالیسی میں تبدیلیاں

وزارت داخلہ کی جانب سے ویزہ پالیسی میں تبدیلیوں سے متعلق بڑا فیصلہ سامنے آیا ہے، قلیل مدتی ویزہ درخواستوں کو سیکورٹی کلیئرنس سے مستثنیٰ قرار دے دیا گیا ہے۔

وزارت داخلہ کی دستاویز کے مطابق غیرملکیوں کو پاکستان کا 30 روز کا میڈیکل اور تین ماہ کا ورک ویزا  48 گھنٹے میں مل سکے گا، دستاویز کے مطابق غیرملکیوں کو تین ماہ تک کا میڈیکل ویزا 48 گھنٹوں میں جاری کیا جائے گا، جسے 1 سال تک بڑھایا جا سکتا ہے تاہم  ایک سال کا میڈیکل ویزا کی درخواست پر 30 روز میں فیصلہ کیا جائے گا اور اس کے لئے درخواست گزار کی سیکیورٹی کلیئرنس اور متعلقہ اسپتال کے لیٹر لازمی قرار دیئےگئے ہیں۔

غیر ملکی پاکستان میں ورک ویزہ پر بھی آ سکیں گے، تین ماہ تک کےورک ویزہ کی درخواستوں پر فیصلہ 48 گھنٹے میں ہوگا، قلیل المدتی ورک ویزہ سیکورٹی کلیئرنس سے مشروط نہیں ہوگا، تین ماہ کیلئے ورک ویزے میں 2 سال تک کی توسیع ہو سکے گی جس کے لئے معاہدہ ملازمت، سی وی، کمپنی ، لیٹر،پروفائل اورایس ای سی پی رجسٹریشن لازمی قرار دیئے گئے اس کے ساتھ ساتھ طویل مدتی ورک ویزا کیلئے سیکورٹی کلیئرنس، سرمایہ کاری بورڈ کا لیٹر لازمی ہو گا۔

وزارت داخلہ کی دستاویز کے مطابق حصول تعلیم کیلئے پاکستان آنے والے غیرملکیوں کو 2 سال کا ویز جاری کیا جائے گا، سٹڈی ویزہ کے لئے سیکورٹی اداروں کی کلیئرنس اور غیرملکی طالب علم یا طالبہ کو اپنے ملک سے متعلقہ وزارت کا این او سی بھی درخواست کے ساتھ دینا ہوگا۔