پاکستان میں کورونا مزید66 زندگیاں نگل گیا،ایک دن میں3800 نئے کیسز ریکارڈ

پاکستان میں کورونا کے وار جاری ہیں، قاتل وائرس مزید 66 انسانی جانیں نگل گیا، ایک دن میں 3 ہزار 800 نئے مریض سامنے کے بعد ملک میں کورونا کیسز کی مجموعی تعداد 11 لاکھ 56 ہزار سے تجاوز کر گئی، گزشتہ چوبیس گھنٹوں کے دوران ملک میں کورونا کیسز مثبت آنے کی شرح 6.75 ریکارڈ کی گئی۔

نیشنل کمانڈ اینڈ آپریشن سینٹر کی جانب سے جاری کردہ اعداد و شمار کے مطابق گزشتہ چوبیس گھنٹوں کے دوران ملک بھر میں 56 ہزار 279 کورونا ٹیسٹ کیے گئے جن میں سے مزید 3 ہزار 800 افراد کے وبا سے متاثر ہونے کی تصدیق ہوئی،جس کے بعد ملک بھر میں کورونا کے مجموعی کیسز کی تعداد 11 لاکھ 56 ہزار 281 تک پہنچ گئی ہے۔

این سی او سی کے مطابق سندھ میں وائرس سے متاثرہ افراد کی تعداد4 لاکھ30 ہزار 594ہوگئی، پنجاب میں 3 لاکھ 91 ہزار297، خیبرپختونخوا میں1 لاکھ 61 ہزار 381، بلوچستان 32 ہزار 200، اسلام آباد میں 98 ہزار951 ،آزادکشمیر میں31 ہزار 988  اور گلگت بلتستان میں 9 ہزار 870 کورونا کیسز رپورٹ ہو چکے ہیں۔

گزشتہ چوبیس گھنٹوں کے دوران قاتل وباء مزید 66 انسانی جانیں نگل گئی جس کے بعد وائرس کے باعث اب تک ہونے والی اموات کی مجموعی تعداد 25 ہزار 670 تک پہنچ گئی ہے، پنجاب میں 11 ہزار 823 اور سندھ میں6 ہزار 834 اموات ہوچکی ہیں، خیبرپختونخوا میں4 ہزار 944، ‏اسلام آباد میں 836 اموات ہوئیں، ‏بلوچستان 338، ‏گلگت بلتستان173 اور ‏آزاد کشمیر میں کورونا سے اموات کی تعداد 695  تک پہنچ چکی ہے۔