پاک فوج کشمیرکاز کیلئےکشمیریوں مکمل حمایت جاری رکھنے کیلئے پرعزم ہے، آرمی چیف

آرمی چیف جنرل قمرجاوید باجوہ سے وزیراعظم آزاد جموں وکشمیر سردارعبدالقیوم نیازی نے ملاقات کی ہے، اس موقع پر سپہ سالار نے اس عزم کا اعادہ کیا کہ کشمیر کاز کیلئے پاک فوج کشمیریوں کی مکمل حمایت جاری رکھے گی۔

مسلح افواج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے وزیراعظم آزاد جموں و کشمیر سردار عبدالقیوم نیازی نے جی ایچ کیو راولپنڈی میں ملاقات کی، جس میں بھارت کے غیرقانونی زیرقبضہ جموں وکشمیر حالات، یکطرفہ بھارتی اقدامات اور لائن آف کنٹرول کی صورتحال پر بات چیت کی گئی۔

سینئر حریت رہنما سید علی گیلانی کو خراج عقیدت پیش کرتے ہوئے آرمی چیف جنرل قمر جاوید باجوہ کا کہنا تھا کہ سید علی گیلانی نے ساری زندگی کشمیریوں کے حق خودارادیت کے حصول کیلئے بے لوث جدوجہد جاری رکھی، انہوں نے وزیراعظم آزاد کشمیر کو یقین دلایا کہ پاک فوج کشمیر کاز کیلئے کشمیریوں مکمل حمایت جاری رکھے گی۔

آئی ایس پی آر کے مطابق جنرل قمر جاوید باجوہ نے سردارعبدالقیوم نیازی کو آزاد جموں و کشمیر کی وزارت عظمیٰ کا منصب سنبھالنے پر مبارک باد دی اور خطہ کشمیر کے استحکام کیلئے نیک خواہشات کا اظہار کیا۔ اس موقع پر سردار عبدالقیوم نیازی کی آزاد جموں و کشمیر میں سیکورٹی و ترقی کیلئے پاک فوج کے کردار کی تعریف کی۔