وزیراعظم کا اپوزیشن لیڈر سے مشاورت کے بغیر چئیرمین نیب کو توسیع دینے کا فیصلہ

 اسلام آباد: وفاقی حکومت نے چیئرمین نیب جاوید اقبال کو توسیع دینے کا فیصلہ کرلیا۔ ذرائع کے مطابق وزیراعظم عمران خان نے اس سلسلے میں اپوزیشن لیڈر شہباز شریف سے مشاورت نہ کرنے کا فیصلہ کیا ہے۔ وزیراعظم عمران خان نے اپنے قریبی رفقاء سے تجاویز مانگیں جنہوں نے موجودہ چیئرمین کو ہی عارضی توسیع دینے کا مشورہ دیدیا۔

نیب قانون کے مطابق وزیراعظم اور اپوزیشن لیڈر کی مشاورت سے چیئرمین نیب کا تقرر لازمی ہے لیکن وزیراعظم عمران خان اور اپوزیشن لیڈر شہباز شریف کی باہمی دوریوں کے باعث مشاورت نہ کرنے کا فیصلہ کیا گیا۔

وزیراعظم کو مشورہ دیا گیا ہے کہ جب تک معاملے پر دونوں جانب سے برف نہیں پگلتی اس وقت تک چیئرمین نیب کو ہی توسیع دی جانی چاہیے۔ حکومت نے اس کام کے لیے صدارتی آرڈیننس کا سہارا لینے کا فیصلہ کیا ہے۔ آرڈیننس کے ذریعے جلد چیئرمین نیب کو توسیع دی جائے گی۔

مشیر پارلیمانی امور بابر اعوان نے بھی اپنے ایک ٹی وی انٹرویو میں کہا ہے کہ وزیر اعظم چئیرمین نیب کی نئی تقرری میں اپوزیشن لیڈر سے مشاورت کے پابند ہیں ، توسیع میں نہیں، جسٹس ریٹائرڈ جاوید اقبال کو چئیرمین نیب ہم نے نہیں، پیپلزپارٹی اور نون لیگ نے مل کرلگایاتھا۔