ووٹر لسٹوں میں بے ضابطگیوں کاانکشاف، دوبارہ گھر،گھر تصدیق ہو گی

  اسلام آباد: قومی ووٹرز لسٹوں میں بڑے پیمانے پر بے ضابطگیوں کا انکشاف، الیکشن کمیشن نے نوٹس لے لیا۔ ووٹر لسٹوں کی دوبارہ ڈور ٹو ڈور تصدیق ہو گی ۔الیکشن کمیشن نے ڈائریکٹر منیجمنٹ انفارمیشن سسٹم کو معطل کرتے ہوئے انکوائری کا آغاز بھی کر دیاگیا۔

ذرائع کے مطابق ووٹرز لسٹوں میں بے ضابطگیوں کے انکشافات پر قائم کمیٹی کی سفارشات پر کارروائی عمل میں لاتے ہوئے ووٹرز فہرستوں کو دوبارہ مرتب کیا جارہا ہے۔ پہلے مرحلے میں تمام صوبائی الیکشن کمشنرز سے ڈیٹا کلیکٹرز ڈسپلے سنٹرز کی تعداد مانگی گئی ہے ، دوسرے مرحلے میں تصدیقی مہم کےلئے اسٹاف کی تربیت کی جائے گی جبکہ تیسرے مرحلے میں ڈور ٹو ڈور تصدیقی مہم شروع کی جائے گی ۔

ذرائع کا کہنا ہے کہ مہم میں 11 کروڑ سے زائد ووٹرز کا ان کی مرضی سے اندراج ہوگا ، ڈیٹا فیڈنگ کے بعد ڈسپلے سنٹرز پر ابتدائی فہرستیں رکھی جائیں گی، ووٹرز کو درستگی، اندراج اور اعتراضات کا وقت دیاجائے گا، آخری مرحلے میں اعتراضات پر فیصلے کرکے حتمی ووٹرز لسٹیں جاری کی جائیں گی۔ عام انتخابات 2023 کےلئے نئی مرتب شدہ ووٹرز لسٹیں استعمال ہونگی، تصدیقی مہم مکمل ہونے تک موجودہ ووٹرز لسٹیں برقرار رہیں گی۔ووٹر لسٹوں کی تصدیقی مہم مارچ 2022 تک جاری رہے گی۔