امریکہ نے ہماری حکومت گرائی، میر جعفر و میر صادق نے امپورٹڈحکومت کو بٹھایا، عمران خان

چیچہ وطنی: چیئرمین پاکستان تحریک انصاف عمران خان نے کہا ہے کہ امریکہ کے غلام سازش کے تحت ہم پر مسلط کیے گئے۔

چیچہ وطنی میں منعقدہ جلسہ عام سے خطاب کرتے ہوئے سابق وزیراعظم نے کہا کہ امریکہ ںے ہماری معیشت دو ماہ میں نیچے گرادی، الیکشن کمیشن بے ضمیر ہے، انہیں جتوانے کی کوشش کی جا رہی ہے، نواز شریف اور آصف زرداری پیسے کی پوجا کرتے ہیں۔
عمران خان نے کہا کہ جتنی بھی دھاندلی کی جائے یہ نہیں جیت سکتے، شریف خاندان نے آج تک ایک کام بھی ایمانداری سے نہیں کیا، حمزہ شہباز! تم جو مرضی کر لو ہم الیکشن جیت کر دکھائیں گے، ووٹنگ کے روز ہر پولنگ اسٹیشن پر 10 نوجوان رکھیں گے، یہ دھاندلی کریں گے انہیں دھاندلی نہیں کرنے دینی ہے۔
سابق وزیراعظم نے کہا کہ امریکہ نے سازش کر کے ہماری حکومت گرائی، یہاں میر جعفر اور میر صادق نے سازش کر کے امپورٹڈ حکومت کو اوپر بٹھایا، یہ چاہے مجھ پر 1500 مقدمات کروا دیں ان کا پیچھا نہیں چھوڑوں گا۔ نواز شریف لندن میں بیٹھ کر خوش ہو رہا ہے، نواز شریف کا مجرم بھائی اور اس کا بیٹا اقتدار میں ہیں، مریم نواز جھوٹوں کی شہزادی جن سے سچ ہی نہیں بولا جاتا، حلیم عادل شیخ کو جیل میں ڈال دیا ہے، مراد علی شاہ جیسا کرپٹ آدمی وزیراعلیٰ بنا ہوا ہے۔
چیئرمین پی ٹی آئی عمران خان کا کہنا تھا کہ نہ قوم ان کو معاف کرے گی نہ ملک کی تاریخ معاف کرے گی، جو ان چوروں کے ساتھ کھڑا ہو گا قوم اس کا احتساب کرے گی، یہاں بھی لوگ سڑکوں پر نکلیں گے، آزادی کا راستہ بند نہ کرو، قوم حقیقی آزادی کیلئے جہاد لڑنے کیلئے تیار ہے۔