بھارتی ریاستی دہشتگردی،24 گھنٹے میں 5 کشمیری نوجوان شہید

سری نگر: مقبوضہ کشمیر میں بھارتی فوج کی فائرنگ سے مزید 3 کشمیری نوجوانوں شہید ہو گئے۔  جس کے بعد 24 گھنٹے میں شہید ہونے والوں کی تعداد 5 ہو گئی ہے۔

کشمیری میڈیا کے مطابق مقبوضہ کشمیر میں قابض بھارتی فوج کے مظالم کا سلسلہ جاری ہے۔ ضلع کپواڑہ میں محاصرہ و تلاشی آپریشن کے دوران بھارتی فوج نے مزید 3 کشمیری نوجوانوں کو شہید کردیا ہے۔ جب کہ اسی ضلع میں گزشتہ روز بھی 2 نوجوانوں کی شہادت کا واقعہ رونما ہوا تھا۔

چوبیس گھنٹوں کے دوران ایک ہی ضلع میں 5 نوجوانوں کی شہادت کے بعد ضلع کپواڑہ میں پہلے ہی معمولات زندگی معطل ہیں۔ اسی ضلع میں ایک پولیس اہلکار کی ہلاکت کی بھی اطلاع ہے۔

دریں اثناء مقبوضہ کشمیر کے اضلاع باندی پورہ اور پلوامہ میں ایک ہفتے قبل ہونے والی نوجوانوں کی شہادت پر آج چوتھے روز  بھی مکمل شٹر ڈاؤن ہڑتال کی جا رہی ہے جس کے باعث کاروباری سرگرمیاں معطل، تعلیمی ادارے بند اور ذرائع نقل و حمل مکمل بند ہے۔