امریکا کی عمران خان پر حملے کی مذمت، پاکستان کے حالات پر تشویش کا اظہار

واشنگٹن: امریکا نے پاکستان میں حالیہ دنوں میں ہونے والے واقعات پر تشویش کا اظہار اور سابق وزیراعظم عمران خان پر فائرنگ کے واقعے کی مذمت کی ہے۔

امریکی محکمہ خارجہ کے ترجمان نیڈ پرائس نے میڈیا بریفنگ کے دوران پاکستان کے حوالے سے بات کرتے ہوئے کہا کہ تشدد کی سیاست میں کوئی جگہ نہیں۔ پاکستان تحریک انصاف کے چئیرمین عمران خان پر فائرنگ کے واقعے کی شدید مذمت کرتے ہیں۔

انہوں نے کہا کہ پاکستان میں حالیہ دنوں میں جو کچھ ہوا ہے امریکا کو اس پر تشویش ہے۔ تمام سیاسی جماعتیں تشددد کے بجائے اپنے اختلافات کا پرامن طریقے سے اظہار کریں۔ تشدد کسی بھی بات کا جواب نہیں ہے۔ان کا کہنا تھا کہ امریکا کے پاکستان سے گہرے روابط ہیں، ہم پاکستانی عوام کے ساتھ کھڑے ہیں۔

نیڈ پرائس کا کہنا تھا کہ آزادی اظہار رائے سے متعلق دنیا کے دیگر ملکوں کی طرح پاکستانی حکام سے بھی بات چیت ہوتی رہتی ہے۔ میڈیا اور شہریوں کی اظہار رائے کی آزادی کسی بھی قوم اور ملک کے مستقبل کے لیے نہایت اہم ہے۔