بلومبرگ نے پاکستان کو دنیا کی دوسری تیزی سے ابھرتی معیشت قرار دے دیا

بین الاقوامی مالیاتی جریدے بلومبرگ نے اپنی تازہ رپورٹ میں پاکستان کو دنیا کی دوسری تیزی سے ابھرتی ہوئی معیشت قرار دے دیا ہے۔ رپورٹ کے مطابق پاکستان نے گزشتہ چار سہ ماہیوں میں اپنی مالی ساکھ میں نمایاں بہتری دکھا کر عالمی سطح پر نئی تاریخ رقم کی ہے۔

ڈیفالٹ رسک میں غیر معمولی کمی
بلومبرگ کے مطابق پاکستان کے ڈیفالٹ رسک میں 2,200 بیسس پوائنٹس کی کمی ریکارڈ کی گئی، جو عالمی مالیاتی نظام میں ایک غیر معمولی پیش رفت ہے۔ کریڈٹ ڈیفالٹ سویپ (CDS) کے اعداد و شمار ظاہر کرتے ہیں کہ پاکستان نے جون 2024 سے ستمبر 2025 تک وہ کارکردگی دکھائی جو بڑی ابھرتی معیشتیں حاصل نہ کر سکیں۔

ترکی کے بعد دوسرا بہتر ملک
بلومبرگ کی درجہ بندی میں پاکستان، ترکی کے بعد دوسرے نمبر پر آیا ہے، جس نے چار سہ ماہیوں کے دوران اپنی مالیاتی پوزیشن میں تسلسل کے ساتھ بہتری دکھائی۔

اصلاحات، نظم و ضبط اور عالمی اعتماد
رپورٹ میں کہا گیا ہے کہ پاکستان کی یہ کامیابی مالیاتی نظم و ضبط، سٹرکچرل ریفارمز، قرضوں کی بروقت ادائیگی، اور آئی ایم ایف پروگرام پر مکمل عمل درآمد کے باعث ممکن ہوئی۔ ان عوامل نے بین الاقوامی سرمایہ کاروں کے اعتماد کو مضبوط کیا ہے۔

مہنگائی اور خسارے پر قابو
بلومبرگ کا کہنا ہے کہ حکومت پاکستان کی موثر پالیسیوں نے نہ صرف مہنگائی پر قابو پایا بلکہ روپے کو مستحکم اور بیرونی خسارے کو محدود کرنے میں بھی کلیدی کردار ادا کیا۔

کریڈٹ ایجنسیوں کی مثبت آؤٹ لک
بین الاقوامی کریڈٹ ریٹنگ ایجنسیوں فچ (Fitch)، ایس اینڈ پی (S&P) اور موڈیز (Moody’s) نے بھی پاکستان کے حوالے سے اپنی مثبت آؤٹ لک برقرار رکھی ہے، جو عالمی سطح پر پاکستان کی اقتصادی بحالی پر بڑھتے ہوئے اعتماد کی غماز ہے۔

محفوظ اور پُرکشش سرمایہ کاری منزل
رپورٹ میں مزید کہا گیا ہے کہ عالمی سطح پر یہ تاثر مضبوط ہو چکا ہے کہ پاکستان اپنی پالیسی کے تسلسل، مالی شفافیت، اور معاشی نظم کے ذریعے ایک محفوظ، پُرکشش اور منافع بخش سرمایہ کاری منزل کے طور پر ابھر رہا ہے۔