الجزائر میں 24 گھنٹوں میں ایک ملین درخت لگانے کا ہدف عبور، عوامی شمولیت نے نئی مثال قائم کر دی

الجزائر میں ہفتے کے روز شروع ہونے والی قومی شجرکاری مہم نے صرف 24 گھنٹوں میں ایک ملین سے زائد درخت لگا کر مقررہ ہدف عبور کر لیا۔ اس مہم میں شہریوں، خاندانوں، تنظیموں اور سرکاری اداروں نے غیر معمولی جوش و خروش کے ساتھ حصہ لیا، جسے ملک میں ماحولیاتی بیداری کی ایک نئی لہر قرار دیا جا رہا ہے۔

شجرکاری مہم نے مقررہ ہدف سے تجاوز کر لیا

الجزائر کے مختلف صوبوں میں ایک دن جاری رہنے والی اس مہم کا مقصد ایک ملین درخت لگانا تھا، تاہم عوامی شمولیت کی بدولت یہ ہدف جلد حاصل کر لیا گیا۔ مہم کے دوران عوام نے اپنے خاندانوں کے ساتھ درخت لگا کر ماحولیاتی تحفظ اور سبز الجزائر کے عزم کا اظہار کیا۔

سوشل میڈیا سے شروع ہونے والی قومی تحریک

یہ مہم انٹرنیٹ پر ایک الجزائری سماجی شخصیت فواد معلی نے “سبز (خضراء باذن الله)” منصوبے کے تحت شروع کی تھی۔ فواد معلی نے میڈیا سے گفتگو میں کہا کہ یہ عوامی جذبے کی جیت ہے، اور اگلی بار اس سے بھی زیادہ درخت لگائے جائیں گے۔ حکومت اور مقامی اداروں کی جانب سے بھی اس منصوبے کو مکمل حمایت حاصل رہی۔

شہریوں کا جذبہ اور عزم

شجرکاری میں شریک 61 سالہ فریدہ عیسیٰ نے کہا کہ وہ اپنے بچوں کے ساتھ آئی ہیں تاکہ ان میں فطرت سے محبت اور محنت کا جذبہ پیدا ہو۔
پچاس سالہ محمد بوشاقور، جو معلی سبز الجزائر ایسوسی ایشن کے صدر ہیں، نے کہا کہ ماضی میں الجزائر کا موسم مرطوب تھا مگر اب نیم خشک ہو چکا ہے، اس لیے درخت لگانا ہماری قومی ذمہ داری ہے۔ انہوں نے اپنی جمع پونجی اس خواب پر خرچ کی ہے کہ الجزائر کو دوبارہ سرسبز بنایا جائے اور صحرا کے پھیلاؤ کو روکا جا سکے۔

ماحولیاتی تحفظ کی جانب ایک مضبوط قدم

ماہرین کے مطابق یہ مہم الجزائر میں ماحولیاتی شعور اور موسمیاتی تبدیلی سے نمٹنے کے عزم کی ایک علامت ہے۔ شجرکاری جیسے اقدامات شمالی افریقہ کے دیگر ممالک کے لیے بھی ایک مثال بن سکتے ہیں۔