بالی ووڈ کے لیجنڈری اداکار دھرمیندر 89 برس کی عمر میں انتقال کر گئے

۔ بھارتی میڈیا کے مطابق پیر کے روز انہوں نے ممبئی کے بریچ کینڈی ہسپتال میں آخری سانسیں لیں۔ ان کی رہائش گاہ کے باہر متعدد بالی ووڈ اداکاروں اور خاندان کے افراد کو سفید لباس میں پہنچتے دیکھا گیا، جو غم اور سوگ کی فضا کو مزید گہرا کر رہا تھا۔

فلم انڈسٹری سوگوار

معروف فلم ساز کرن جوہر نے انسٹاگرام پر دھرمیندر کی وفات کی تصدیق کرتے ہوئے انہیں زبردست خراجِ عقیدت پیش کیا۔ بھارتی میڈیا کے مطابق اداکار کو دو ہفتے قبل سانس لینے میں دشواری کے باعث اسپتال منتقل کیا گیا تھا۔ رواں سال اپریل میں ان کی آنکھ کی سرجری بھی ہوئی تھی۔

رپورٹس کے مطابق دھرمیندر نے آخری مرتبہ اپنی اداکاری فلم “اکیس” میں دکھائی، جو 25 دسمبر کو ریلیز ہونے والی ہے۔ ان کے مداح اس آخری پرفارمنس کو جذباتی حوالے سے انتہائی اہم قرار دے رہے ہیں۔

چھ دہائیوں پر محیط شاندار کیریئر

دھرمیندر نے 1960 میں فلم “دل بھی تیرا ہم بھی تیرے” سے اپنے کیریئر کا آغاز کیا۔ 2012 میں انہیں حکومت ہند کی جانب سے ملک کا تیسرا بڑا شہری اعزاز پدم بھوشن دیا گیا۔
انہوں نے اپنے کیریئر میں شعلے، یادوں کی بارات، میرا گاؤں میرا دیش، نوکر بیوی کا، پھول اور پت، پھول اور پتلی سمیت کئی یادگار اور ایوارڈ یافتہ فلموں میں کام کیا۔ ان کے کردار نہ صرف ان کے دور میں مقبول رہے بلکہ نئی نسل میں بھی پسند کیے جاتے ہیں۔

گاؤں سے فلم نگر تک

پنجاب کے ضلع لدھیانہ کے ایک گاؤں میں دھرمیندر کیول کرشن دیول کے نام سے پیدا ہونے والے اداکار نے فلمی دنیا میں قدم رکھنے سے پہلے 19 سال کی عمر میں پرکاش کور سے شادی کی۔ بعدازاں اداکارہ ہیما مالنی کے ساتھ ان کی محبت نے جنم لیا، جس سے انہوں نے شادی کی۔ دھرمیندر کی زندگی ہمیشہ شہرت، محبت، تنازعات اور کامیابیوں کے امتزاج کے طور پر یاد رکھی جائے گی۔

سادہ زندگی، محبت بھرا دل

دھرمیندر آخری وقت تک سوشل میڈیا پر سرگرم رہے۔ وہ اکثر صحت مند طرزِ زندگی کی ترویج کرنے والی ویڈیوز شیئر کرتے، ٹریکٹر چلاتے، فارم کی دیکھ بھال کرتے اور اپنے مداحوں کو سادہ زندگی، محنت اور کاشتکاری کے مشورے دیتے نظر آتے تھے۔
ان کی یہ ویڈیوز لاکھوں افراد کے لیے حقیقی تحریک کا ذریعہ بنیں۔

 ایک عہد کا اختتام

دھرمیندر کی وفات نہ صرف بھارتی فلم انڈسٹری کے لیے بلکہ دنیا بھر کے مداحوں کے لیے ایک عظیم صدمہ ہے۔ ان کا فن، ان کی مسکراہٹ، ان کا انداز اور ان کی سادگی ہمیشہ یاد رکھی جائے گی۔ فلمی دنیا میں وہ خلا چھوڑ گئے ہیں جسے پورا کرنا ممکن نہیں۔