مزید 4 بچے زندگی بھر کیلئے معذور، پولیو کیسز کی تعداد 41 تک پہنچ گئی

اسلام آباد: پاکستان میں پولیو سے متاثرہ افراد کی تعداد میں تشویشناک حد تک اضافہ ہو رہا ہے۔ مزید مزید چار بچے زندگی بھر کے لیے معذور ہو گئے جس کے بعد رواں برس پولیو کیسز کی مجموعی تعداد 41 ہوگئی ہے۔

وزارت صحت کے ذرائع کا کہنا ہے کہ 2 پولیو کیسز خیبرپختونخوا اور 2 بلوچستان میں سامنے آئے ہیں۔ بلوچستان میں جعفر آباد کی یوسی شاہان پلال میں 8 ماہ اور قلعہ عبداللہ کے علاقے پنج پیرانی میں 9 ماہ کے بچے میں وائرس کی تصدیق ہوئی جب کہ خیبرپختونخوا میں بنوں کی یونین کونسل حوید کے ڈھائی سالہ بچے اور بنوں کی ہی یوسی جانی خیل کی 1 سالہ بچی میں پولیو وائرس کی تصدیق ہوئی۔

ذرائع کے مطابق پولیو کا شکار 3 بچوں کے والدین ویکسینیشن سے انکاری تھے۔ اس کے علاوہ رواں برس پنجاب سے 3، بلوچستان سے 2، خیبرپختونخوا سے 25 اور قبائلی اضلاع سے 8 پولیو کیسز سامنے آچکے ہیں۔